Zeremiah paphôhna nata Khazohpa achhyna
1 Hy ABEIPA, nâ lâta ei paphôhpa chhaota nâ la nâ do tyh; châhrasala ei nô-una bie ei reih aw. Khazia e hmoparaopazy lâpi cha vânoh topa ta a y tyh tly?
2 Âmo cha loh chi ta, thari ama thla; laiseih ei ta, ama pathei; ama hmao liana chata a hnia chi ta, ama chhôh rih lâta a hla tlôh chi.
3 Hy ABEIPA, kei deikua cha na pahno chi ta; na hmô chi ta, nâ lâta ei pathipalôh a hlana na pasia tyh. Âmo cha mietahkupa thie awpa hawhta a daophi la, ama thina noh awpa cha rao mah y.
4 Râh cha khachâ e mâchhiesapa ta y aw ta, râh sibiepazy cha ama uah aw? A pahrâpazy moleina vâta râhsa zy nata pavawzy cha thie khai ei ta, “Khazohpa ta eima hmotaopazy cha hmô aw vei,” ama tahpa vâta.
5 “Phei ta a siepa chyhsazy cha a râpasua lâhpa ta na tha ama cha pazei khiahta cha,kheihta e arâzy nâ râpasualâh thei aw? Adyhna râh liata a bohpa ta y hra la, Zawdâh lai ngâpa liana chata kheihta e na tah aw?
6 Na unawhpazy, na paw chhôhkhapa zy tlai chata, âmo tlai chata cha dô haw tlôh ei ta; âmo chata châ chadaipa ta a paropa ta cha aw ei ta; bie phapa reih hra ei sala zo khâ.”
7 “Ei o siesaipa ta, ei ryu to awpa ei thy haw; ei hrona ta a kho ngaitapa cha a khakhaipa hnohta ei pie haw.
8 Ei ryu to awpa cha lyurâhpa chakeibarôhhneipa hawhta a vaw châ haw, kei lâta a ao papuapa ta; chavâta ano ei hao.
9 Ei ryu to awpa cha kei châta sahei niepa pavaw chapaipa a châ ma? Sahei niepa pavawzy ta a chheipâh ta ama siehnao ma? Râh sa zydua pakhy ula; nie awpa ta a vaw chhi teh u.
10 Mietahkuvaihtuhpa a hluhpizy chata ei kresahdô parao ei ta, ei topa châ tlypa ei ta, ei tovyuh pha ngaitapa cha râhpathohpa roryhrapa ama pachâsa haw.
11 Rohryhrapa ta tao haw ei ta; rory hra ta, kei lâta mâchhiesapa ta a châ. A râh zydua roryhrapa ta y ta, châhrasala ahyhmah ta pachâ veih ei.
12 Râhpathohpa liata tlâh pathaihparohpa zydua liata zy, hraotuhpazy vaw tlô haw ei ta; a râh chhâna hiakha lâ tawhta hiakha lâ taihta ABEIPA zaozi chata palâ khai haw tlôh ta; thatlôna a hneipa rai y tlôh vei.
13 Uit sâh cha tu ei ta, ahloh hria ei ta, ama rie thata a pathei ei ta, athôhna y tlôh leipa ta. ABEIPA hiehâhna ru ngaitapa vâta nama theilâpazy cha nama zakhei aw.”
14 Ei chyhsa Izarelzy hnohta ryu to awpa ta ei piepa a paraotuhpa ei vaih moleipa zyduazy hnohta ABEIPA chata he tana heta a tah: “Ama râh tawhta phia aw na ta, ama hry tawhta Zudah chhôhkhapazy ei phia aw.
15 Ei phia khai tawhta âmo ngiachhie heih aw na ta, chyhsa to ryu to awpa nata chyhsa to ama râh tlai lâna chata ei vaw chhi heih aw.
16 Baal lâta ei chyhsazy chhiesa ama pachupa haw hra ta, ei mo ta ‘ABEIPA a hroh,’ tahpa ta chhiesa pachupa ta, ei chyhsazy yzie pakhâta ta amâ chu khiahtala, ei chyhsazy hry liata ei padua aw.
17 Châhrasala ama nahthlie vei khiahtala, cha phopi cha phia aw na ta, ei parao khai aw, ABEIPA ta a tah.”