1 “He vâna heta ei pathipalôh a chalyu ta, â chachhao ngâ kaw.
2 A ao parona cha liahsa nahthlie ula, a pakah tawhta a vaw puapa pyu chhao cha.
3 Avâ ry zydua liata pasiesa ta, a dôhla chhao cha kaokih padaipa ta.
4 Cha khai tawhna chata a ao papua ta, a rôhnahna ao chhaota a rôh ngâ kaw, a ao ama pahnopa chhaota chalih sa vei.
5 Khazohpa cha noâhchhih ngâsâpa ta a ao cha papua ta; hmo rôhnah ngaitapa liata pahno thai leipa a tao.
6 Dâhaw hnohna chata, ‘Alei lâ tla teh’, tah ta; avâsua nata avâkatlâ hnohta, ‘Ru ngaitapa ta y teh’ tah ta.
7 Chyhsa to ku cha palâsa khai ha ta, chyhsa zydua ta a hmotaopa ama pahno thei nawpa ta.
8 Râhsa zy cha amâ nyuna tlua ei ta; ama lôpu liata ama pahrâ.
9 Chhôhpadâhpa chôlâ tawhta khisô vaw pathli ta, vâsua chata chasina a vaw tlôkhei.
10 Khazohpa hu vâta tikuapa vaw y ta, ti kawh ngaitapa kua khaipa ta a y.
11 Meihdo chhakalupa zy cha dâhaw ta paliesa ta, meihdo liana chata dôhla a pathliesa.
12 Ano chhihthapa ta ahie ngâ ei ta, a biepiepa hawhta ama padô khai na taihta khizaw pahrâ theina zydua liata.
13 Pado nawpa ta tlyma, a râh pha nawpa ta tlyma. zawngiahna vâta tlyma a patlôsapa a châ.
14 “Zawba y, he he nahthlie tua teh; a chalih la, Khazohpa hmotao noâhpa cha pachâ teh.
15 Khazohpa ta chazy chô liata a biepiepa cha na pahno rai ma, a meihdo liata dôhla a vaw pathliesana zy chhao he?
16 Meihdo zy su khata ama su liata sopa a châ thei zie zy, pahno pakina hneituhpa hmotao noâhpa zy na pahno thei ma,
17 chho lâ ziza vaw pathli ta, alei vaw palo nahta na chysia a vaw lalôh khai nata kheihta e na pahno thei?
18 Ano hawhta avâ khi na pakai thei aw ma, thlalâ leipa hawhta a châkarôpa cha?
19 Ano liata eima rei awpa cha maniah pachu teh, zohna kyh vâta pachâna hnei thai mapi hih.
20 Chyhsa ta bie a reih nota Khazohpa ary liata a soh thei ma? bie reih awpa ta ano cha bie a pie thei ma?
21 “Buakha ta khaihpa cha hmôpa y leipa ta, vâsua nata meihdo ta khu ha ta, ziza cha pathli ta, vaw pathai ha ta.
22 Maw lâ tawhta ngôh khaih ngaitapa vaw pua ta; Khazohpa rôhnahna rarôypa ta a tobi ta.
23 Atotaotheipa cha hmô thei ma pi; a hmotaotheina cha eima taotheina khô lâ châ ta, a siana cha dona tao awpa ta anainô sô vei.
24 Chavâta chyhsa zy ta ano za ei ta; Apasosapa zy maih cha ano lâ moh ei ta,’ tah ta.