Zawba ta hmia lâta alyna a theina
1 Chatawhcha Zawba chata bie reih pazao ta, reih heih ta:
2 “Aw, thla a lei hapa liana khata ypa châ sala, Khazohpa ta eina vaina noh zy liana khata;
3 ei luh chôta a meiôh a pakhaih nona kha, a khaihna hmâpa ta zohna liata chhao charei na ta;
4 ei locho noh hmâna daihti zy nata, Khazohpa a pakyhna ei poh-o liata a y no zy kha;
5 Atotaotheipa ei hnohta a y thlâh ha nota, ei sawzy chhao ei kiapâh liata ama y no kha;
6 ei siena zy sâhpiti ta pasipa a cha no nahta, alôpanô ta ei châta sathaw a palosa ngâ nona kha!
7 Khihpi ochhi pangaipa ta ei pua nona kha. othliah liata atyuna ei paryh ngâno na kha,
8 satliapa zy ta na hmô ei ta, a nyu ei ta, machâpa zy cha thyu ei ta, a duah ei ta;
9 abeisaw zy cha ama bierei a chalih ei ta, ama ku ta ama hmao chahu ei ta;
10 chyhsa laipazy ao dia ha ta, ama dâh chô liata ama palei a bai ta.
11 Nahkhao ta a theipa zy ta nohlao na tah ei ta, mo ta a hmôpa zy ta na pahnokhei ei ta;
12 chyhsa rietheipa a chapa ei pachha tyhpa vâta, paw hnei leipa, ahy hmah ta baotuhpa a hnei leipa chhao.
13 Aleidia daihmâpa byhnâ ei chôta tlô ta, nôhmei palôh chhao alyna hla pasasana ta.
14 Siana cha a tobi na ta, eina pahly hra, ei dona kyh he viahpakao pasihpa nata khutho hawhta a châ.
15 Mochaopa châta mo châ na ta, pheisypa châta phei ei châ.
16 Chyhsa rietheipa paw châ na ta, ei pahno beih leipa zy ei tymâkhei tyh.
17 Chyhsa sia leipa naoh cha thlie na ta, a hâh liata a hmo siepa cha ei lapa tyh.
18 ‘Zachhihpa ta thi aw na ta, ei noh zy cha sadi hawhta reitiah leipa ta ei papôh aw,
19 ti lâta ei thari sie patla ta, a zozâkhihdei ei chiah liata a diah a y thlâh haw,
20 ei rôhnahna cha keima liata thi ngâthlâh ha ta, ei libaw cha ei ku liata a thi thlâh haw,’ tahpa ta ei pachâ.
21 “Chyhsa zy ta na nahthlie ei ta, ama hâ thlâh haw, ei chhoreina hâpa ta chokaro amâ thloh.
22 Ei rei khai tawhta ahy hmah ta reih tlâ veih ei, ei biereipa cha ama chôta a tla.
23 Vâsua hawhta eina hâ thlâh ha ei, vâsua hnôh chaipa hawhta a ngiatiah leipa ta ama pakah ama â.
24 Ama chôta ei pahnei no ta, riahpha ta y ei ta, ei hmia a khai nota, ama hmia ly leina zy a pahlei
25 Ama lâpi a tlyh na ta, ama beipa hawhta ei y, pheisaih sahlao hryta hyutuh chaipa hawhta y na ta, mâchhiesapa zy thlahpalôhtuhpa hawhta.