Zawba ta Khazohpa rôhna zie a phuahna
1 “Chatanachata Zawba ta a chhy ta:
2 “Thatlôna a hnei leipa chyhsa cha kheihta e na bao hra tly? Tha a hnei leipa bâh cha kheihta e, zua na pachha aw tly?
3 Sona a hnei leipa cha pasopakâ chi ta, pahnona pha ngaitapa na reih hluh ngaita kaw dia!
4 Ahy hnohta e biezy reih chi ta, ahy thlahpa e nâ tawhta a vaw pua?
5 A thi hawpa zy a chalyu ei ta, tizy nata a yna zydua chhao.
6 Khazohpa hmiakô ta Sheôl cha thluahruapa a châ, Abadon chata khuna hnei vei.
7 Su ruapa liana chata maw parai ta, alei cha khâpa hmah y leina liata abahai.
8 A meihdo chhakalupa zy liana cha ti cha chaty ta, a meihdo cha a ry liana cha kei vei.
9 A beidyuchhai hmia cha khu ta, a chôta meihdo pazawsa ta.
10 Ti chô cha a râhri tao ta, zohna nata khaihna likawh zy chhao.
11 Avâ tôhzy cha a chalyu ta, a rana noâh kaw ei ta.
12 A hmotaotheina ta tilaipi chalyusa ta, a pahno thaina ta Rahabi cha thie ta.
13 A hu ta avâ cha pathaisa ta, a ku ta pari a râ chahrapa cha chhôpahlie ta.
14 Hezy he a siena zie khôtho lâ deita a châ, a thâtih eima pahnopa he a chyh ngâsâ kaw dia! Châhrasala a hmotaotheina pyu cha ahy e a pahno khai thei aw?” tah ta.