Moleipazy nohlaona Zawba ta a reizie
1 Chatawhcha Zawba chata a chhy ta:
2 “Ei biereipa zy he pakhâta ta na nahthlie teh u, he he nama thlahpalôhna bie cha châ mawh sy.
3 Na ngiachhi ula, ei vaw rei tua aw, ei rei khai tawhna cha na pahneisao la vâh eichi.
4 Ei paphôhna he chyhsa chô liata a châ tlyma? Mao-oh theipa rih ei châ tlyma?
5 Na moh ula, noâh kaw teh u, nama ku ta nama pakah pamai teh u.
6 Ei vaw pachâ nata ei nô a po, china ta ei sapa a patu.
7 Kheihta e, hmoparaopa hroh thei ei ta, vaw machâ ei ta, hmotaotheipa ama vaw châ tly?
8 Ama pathlazy cha ama mohmô ta pa-isa ta, ama satheizy cha ama mohmô liana tlai cha.
9 ‘Ama ozy cha china tawhta â bohpa ta, Khazohpa sômasih chhao ama chôta tla hra vei.
10 Ama viahchao tôhpa ta chakâ leipa ta chi a pathla, ama viahchao panô taw patawh ta hrie beih vei.
11 Sazawzy hawhta ama tawzy papuasa ei ta, ama tawzy cha ama la.
12 Ama totâ nata tlaipi zy paryhpa ta ama sa, ama ramo pyu ta ama tha a pha.
13 Ama nohzy cha nohlaopa ta hmâh ei ta, Sheol lâna cha thlahlôhpa ta ama khô.
14 Khazohpa ota, ‘Maniah siesai mah y! Na lâpi pahnona he khoh ma pi,’ tah ei ta.
15 Atotaotheipa cha khâpa e a châ, ano ei chakao awpa cha? A hnohta thlahchhâ ei sihla, khâpa a thôhna e eima hmô aw?
16 Ama hneirôna cha âmo taotheina ta a pachâ ei ta, châhrasala ama pachâna zie cha a pyh thei vana.
17 “Hmoparaopazy meiôh cha a thi hoh pachai dia? Vâchhiena a tyhpa y veih ei ma? Khazohpa ta hmoparaopazy cha hiehâhpa ta hrie tyh vei ma?
18 Sawphao ziza ta a phaohpa hawhta nahta, savia thlih ta a phaoh pahaipa hawhta châ vei ei mâ?
19 ‘Khazohpa ta ama hmoparaona cha ama sawzy châta a pachô,’ tah eichi ta. Ama chô liata patlôsa se, ama pahno theina awpa ta.
20 Ama mo tlaita ama raona cha hmô ei sala, Atotaotheipa hiehâhna chhao cha dô ei se.
21 Ama lei na tawhta ozy cha khâpa e a châ, ama thla reina zy pachhâsapa a châ tina cha?
22 Khazohpa ahy e pahnona pachu awta, chyhsa chônôpa zy pachia tlôh ta?
23 A locho nota chyhsa thie ta, thlahlôhpa nata palôhtlâh ngaitapa ta y ta.
24 A pôhpa cha thawta bie ta, a ru lathli cha a pachô.
25 Chyhsa hropa cha pachârôh ngaitapa ta thi ta, phana rai padi beih leipa ta.
26 Dolei liata miakha saita a zia ei ta, châkariepa ta a pahly khai ei.
27 Nama pachâna zie ei pahno na, su lei ngaitapa ta ei chôta tao namâ chhuahpa zy cha.
28 ‘Khataih liata e, abeisaw o cha a y? Chyhsa moleipa pahrâna poh-o cha khataih liata a y? tah eichi ta.
29 Khitlypa chyhsa zy hiahri veih eichi ma? Ama reipa zy chhao a pyh veih eichi ma?
30 Moleipa cha vâchhiena noh liata pahlôhpa ta a y ma? Pathi-iana noh liana cha pachhapa a châ rai aw ma?
31 Ahy e, a hmiakô liata a phuah aw ta, ahy e, a hmotaopa cha a thô aw?
32 Thlâ lâta siekheipa a châ tita, a thlah cha vaipa a châ hra.
33 Sa hluhpi zy ta ano pabuna cha ahlao ei ta, a pôhpa paziana buchâh cha pathai ta, hluhpi ta a thlâ sai ei ta;
34 Cha khiah, khazia e, bie thuthâ leipa ta thlah eina palôh eichi? Nama chhyna lia heta haipa deileipa ta cha khâpa hmah y vei,” tah ta.