Abeipa ryureina chhôh nata hmotaotheina
1 ABEIPA cha ryurei ta; leilô he thaphapa ta y sala; liahpahlô hluhpi zy cha aly ngaitapa ta y mawh sy!
2 Meihdo nata zohna he a chheipâh liata y ta; siana nata pachiana siapa cha abeidyuchhai bôna a châ.
3 A hmialâna chata mei sie ta, a chheipâh liata ano khakhaipa zy cha a kâ khai.
4 A dôhla zy chata khizaw he khaih ta; alei heta hmô ta, a chalyu ta.
5 Tlâhzy cha kheihlô hawhna heta ABEIPA hmiakô liata zao haw ta, leilô zydua ABEIPA hmiakô liana chata.
6 Avâ zy khita a siana cha tlâh awhkhei tyh ta; pho to chata a rôhnahna zie hmô haw heih ei ta.
7 Khazoh nohthlahpa tao chhyhpa zy chakaotuhpa zydua cha maohphyuhpa ta y mawh sy, khazoh nohthlahpa a palaikheituhpa zy cha; nâmo khazoh zydua saih u, ano achhy teh u.
8 Zaio chata thei ta, aly ngaitapa ta y ta. Zudah sawchanô zy cha thapha ngaitapa ta y hra ei ta. hy ABEIPA, na pachiana zy vâta.
9 ABEIPA, nâ cha leilô zydua chô liana heta chônôchaipa châ tlôh chi ta; nâ cha khazoh zydua chô syulyu ta palyupalihpa ta y chi ta.
10 ABEIPA kyh pachâ ta moleina a haopa saih u; ano chata a chyhsa pathaihpa zy hrona cha a vao ta; âmo cha hmoparaopa zy ku tawhtapa a pachha tyh.
11 A siapa châna chata khaihna he pavâpa châ ta, pathipalôh dopa a phaohpa châna chata alyna a châ hra.
12 A siapa saih u, ABEIPA liata aly ngaitapa ta y ula, a moh pathaihpa cha reithai teh u.