Hlazy 64
Khakhaipa pahno leipa zy tawhta aboh nawpa ta thlahchhâna
Hla chhihthatuhpa châta. Davi Reithaina Hla.
1 Hy Khazohpa, ei nôpona kyh liana heta ei ao vaw thei la; khakhaipa chichhihna tawhna heta ei hrona hrôbieh mah y,
2 hmo chhiepa a taotuhpa zy a ru lâta amâ chhohiana tawhtapa na nyu mah y, hmoparaotuhpa zy pahmaohpakhyna tawhtapa cha,
3 chazy chata zaozi hawhta ama paleih chatah ei ta, chyhsa a thaipa cha su dâhthlohpa liata ama ka thei nawpa ta,
4 ama châtai bie khahpa zy chata mopâ ei ta, chi leipa ta sôkha ta thlai ama kapâ tyh.
5 Hmo moleina liata a pasyu ei ta; khoheih a ru lâta chôna kyh liata zy a chho ei ta, “Ahy e chazy cha a hmô aw?” tah ei ta.
6 Hmoparaona tlua tyh ei ta, “Phana khoh ngaitapa ta eima tlua khai haw,” tah ei ta. Ama chhôh lâ pachâna nata pathipalôh cha a thuh ngaitapa sai a châ!
7 Châhrasala Khazohpa ta âmo ka aw ta; sôkha ta châtai ta hmah paphaopa ta ama y aw.
8 Cha hawhna chata âmo paleih tlai chata âmo a dyuhpa vâta papaopa ta y aw ei ta; âmo a hmôpa maihta ama luh ama chahua aw.
9 Chatanachata chyhsa zydua ta chi aw ei ta; Khazohpa raihria cha ama phuah aw, a hmotaopa cha so ngaitapa ta ama pachâ aw.
10 A siapazy cha ABEIPA liata aly aw ei ta, ano liana chata ngâna pahnieh ei ta! Pathipalôh do ngaitapa a phaohpa zydua chata amâ palaikhei aw!