Moleina a palaikheina khâpa hmah a châ leina zie
Hla chhihthatuhpa chata. Davi Maskil: Edôma chyhsa Dôeka chata Sawla hnohta. “Davi Ahimeleka o liata a sie.” tahpa a chho notahpa.
1 Hy chyhsa thatlôpa, khazia hmoparaopa nâ palaikhei? Khazohpa nô phana cha khâ a y tyh.
2 Na palei ta hmo molei ngaitapa tao a pachâpady tyh, chaidâ tiah ngaitapa, dôhmâhpa hawhna heta.
3 Phana hlâta hmo moleina pasô via chi ta, a siana bie reipa hlâta haina bie reipa na pasô via hra. Selah
4 Hy na palei dôhmâhpa, chyhsa a palâ khai theipa bie zydua cha na pasô ty.
5 Khazohpa ta cha hawhna hra chata chhâzaw châta a cha pahleipadia aw; cha patu aw ta, na poh-o tawhta cha daophi aw ta; a hropa râh tawhtapa he a cha phia pathla aw. Selah
6 A siapazy chhaota ama hmô nahta, chi aw ei ta, ama pahneisao aw,
7 “Moh tua u, he chyhsa he na a châ, Khazohpa a thatlôna ta a tao khoh leipa, thata a hneirôna tlao ngâ ta, moleina liata a tha a patlôpa cha! tahpa ta.
8 Kei deikua cha Khazohpa o liata ôli tho a panyuhpa ta a thaopa hawhna cha ei châ. Khazohpa zawngiahna cha chhâzaw nata chhâzaw ta ei ngâ aw.
9 Cha cha na taopa vâta chhâzaw ta alyna bie khâ ei cha hlâ aw. Na moh pathaihpa zy mohmô liana chata na moh cha ei hâ thlâh ha aw, pha tlôh ta.