Khazohpa ngâna zâlâ thlahchhâna
Hla chhihthatuhpa châta: totâ chi nanopa ta sapa, Davi Reithaina Hla.
1 Hy ei siana avaihtuhpa Khazohpa y, ei cha aw tina cha nâ chhy mah y! Ei nôpo nota nâ ta ei hu na pahieh tyh chi ta. Na ngiachhie la, ei thlahchhâna he na thei mah y.
2 Hy chyhsa zy saih u, ei rôhnahna he khachâ e nozapa ta nama paysa aw?Khachâ e khâpa hrao leipa pasôpa ta, haipa bie nama tlua aw? Selah
3 ABEIPA chata Khazohpa a pachâpa zy cha ano châta a soh nano tyh tahpa he pahno ula; ABEIPA cha ei awna maihta eina nahthlie aw.
4 Hiehâh ula, hmo parao khah u; nama rakhô chô liana cha nama palôh ta pachâ ula, a chalih thlâh ha teh u. Selah
5 Siana atheihna zy cha hlâ ula, ABEIPA liana chata nama ngâna pahnieh teh u.
6 Chyhsa hluhpi chata,“A phana zy eima hmô thei ngyu aw na tahpa ta! Hy ABEIPA, na hmia khaihpa khata eima chô liata pakhaih mah y!” tah ei ta.
7 Ama sa nata kresawti a thôh nota amâ lyna hlâta aly viana ei palôh liata paysa chi ta.
8 Thlahlôh ngaitapa ta a zia na ta, ei mô hra aw; ABEIPA, nâma deita he na, keima dei chhaota a bohpa ta na paysa tyhpa chi.