Hlazy 17
Taolatuhpazy tawhta abohna thlahchhâna
Davi Thlahchhâna.
1 Hy ABEIPA, a dona thei la; ei cha awna he nahthlie mah y! Ei hmao haih leipa thlahchhâna he thei mah y!
2 Nâma tawhta ei thai châna he a puapa châ sala! Na mo cha a dona kyh moh mawh sy!
3 Ei palôhrupa pasiapa châ sala, zâta eina vaih chi khiahtala, na pasia chi ta, khâpa hmah hmô tlôh leipa chi ta; ei pakah chhao heta rei chhei aw vei.
4 Chyhsazy hmotaopazy cha reih aw va na, nôchhiepa lâpi cha ei khokhâh haw.
5 Ei keih chakâna heta na lâpizy khâchâ a chhih ta, ei pheizy chhao a hai beih vei.
6 Hy Khazohpa, cha aw na ta, nâ ta einâ chhy tyh aw chi; na nah pachô la, ei biezy thei mah y.
7 Hy nâma liata ngâna a pachhôpa maih âmo adyuhtuhpazy tawhta na ku chachâh lâta a pachha tyhtuhpa, na kyhpachâ nôpha noâhchhih ngaitapa cha palâsa mah y.
8 Na mosaw hawhta na vaih la, na mathlaw nohpahli ry liana cha na nyu mah y,
9 moleipa nâ paraotuhpa nata ei khakhaipa chichhihpa liahsa na dô hapa zy tawhna heta.
10 Ama palôhrupa liata ngiachhiena cha khawpa ta; ama pakah zy ta apalaina bie ama reih tyh.
11 Atahmâ la ei chakâna zydua he na dôh khai ei ta; alei liata papao awpa ta ama mozy ei chôta ama khaih.
12 Âmo cha chakeibarôhneipa sa tai a byuh ngaitapa hawhta nata chakeibarôhneipa dawpa su dâhna liata cho â byhkhâhpa hawhta ama châ.
13 Hy ABEIPA, thyu la! ano cha hmia chhy la thy pathlah mah y! Hmoparao penawh zaozi tawhtapa cha na pachha mah y,
14 hy ABEIPA, chyhsa ku tawhta nata chyhsa ama hro chhôhta khizaw ryu a totuhpazy tawhtapa cha. Ama py cha na ryu pabiepa tyh chi ta; sawzy chhao ama palôh tlâhna taihta hnei ei ta; ama hmo hmâ laibâhpa zy cha ama hawsaih châta ama siesai tyh.
15 Kei la, siana ta na hmia cha hmô aw na ta; nâma lyuna hneipa ta mo ei padeih tina cha ei lyna â ki ha aw.