Izarel cha Abeipa palyupalih awpa ta chhoreina
1 ABEIPA cha reithai teh u! ABEIPA lâta hla thiehpa sa ula, mopathaihpa zy apakhyna liana chata a reithaina hla sa teh u!
2 Izarel sahlao cha âmo a Taotuhpa chô liana chata a ly ei sala, Zaio sawzy cha ama Beichaipa chô liana chata thapha ei se!
3 Â mo cha lâpa ta reithai ei sala, khoh nata totâ chhaota ano reithaipa ta sa mawh sy!
4 ABEIPA cha a chyhsa zy chô liata aly tyh tlôh ta; a reisipazy cha pachhapa ta a pangiasa aw.
5 Mopathaihpa zy cha rôhnahna liata aly ngaitapa ta y ei sala; ama rakhôzy liana chata thaphapa ta sa ei se.
6 Khazohpa palyupalihpa ta reithaina cha ama pakah liata y sala, zaozi a koh nata a hâh a tiah rairiehpa ama ku liata y hra mawh sy,
7 phopi chô liata phuh lapa ta, chyhsa to chô liata hriena patlôsa awpa nahta.
8 ama abeizy cha bâlia ta chahrypa ta, ama chyhsa phapazy cha thua keihraizy dai awpa nata,
9 pachiapa ro chiehpa ta âmo chô liata pachia awpa ta! Cha palyupalihna cha mopathaihpa zydua chata hnei chyu ei ta. ABEIPA cha reithai teh u!