Thina tawhta pabohsana alyna bie reina
1 ABEIPA cha a kyh ei pachâ, ei ao nata ei hia chaimâhna zy cha a nahthliepa vâta.
2 Kei lâta nah a vaw pachôhpa vâta, ei hro chhôh zydua ta ano cha ei pado aw.
3 Thina khawhrizy chata na chazei ta; Sheôl pasana zy chata na patu ta; nôpona nata pachârôhna a vaw tyh na ta.
4 Chatanachata ABEIPA moh cha padona ta: “Hy ABEIPA, ngiachhiepa ta ei hrona he pachha mah y!” tahpa ta.
5 ABEIPA cha ngiachhie thei ngaitapa nata sia ngaitapa châ ta; eima Khazohpa cha zawngiah thei ngaitapa a châ.
6 ABEIPA chata a ngâpazy cha hrôbieh tyh ta; panawhpa ta y na ta, ano chata na pachha haw ta.
7 Hy ei hrona, na pahâna lâna chata kua heih teh; ABEIPA chata na chô liata a pha ngaitapa ta tao tlôh ta.
8 Ei hrona he thina tawhtapa, ei mozy he mothlih tawhtapa, ei pheizy he a hluana tawhtapa pachha tlôh chi ta;
9 a hropa râh liana heta, ABEIPA hmiakô liata ei charei aw.
10 A ngiapâ na ta, bie ei reih aw hih, “Thata rie patheipa ta ei ypa vâta;”
11 ei heiviheivâ na ta, “Chyhsa zydua a haihpa ama châ,” vaw tah thlâh ha na ta.
12 Ei chô liata hmo a phapa ta a taopa zydua vâna heta, ABEIPA cha khâpa e ei pie hri aw?
13 Pachhana nyu la aw na ta, ABEIPA moh cha ei pado aw,
14 ei bietaipa zy cha ABEIPA liata ei patlô aw, a chyhsa zydua hmiakô liana chata.
15 A mopathaihpa zy thina cha ABEIPA pachâ ta a sôh ngaitapa a châ.
16 Hy ABEIPA, châ chakaopa ei châ chaimâh na; châ chakaopa na seichanô sawchapawpa cha châ na ta. Eina chahryna zy cha pathlâ haw chi ta.
17 Alyna bie rei atheihna zy cha cha hlâ aw na ta, ABEIPA moh cha ei pado aw.
18 Ei bietai zy cha ABEIPA hmiakô liata ei patlô aw, a chyhsa zydua hmiakô liata,
19 ABEIPA o dôhpachhôh tlyhmia liata, hy Zerusale, na lialiah tlai liata ei patlô aw. ABEIPA cha reithai teh u!