Khakhaipa tawhta pabohsa nawpa ta thlahchhâna(Hla 57: 7-11; 60: 5-12)
Hla. Davi Reithaina Hla.
1 Hy Khazohpa, ei pathipalôh he a pachyu na, ei pathipalôh he a pachyu na! Hla ei sa aw, reithaina hla ei sa aw! Ei thlahpa, a hra teh.
2 Tlaipi nata totâ saih u, a hra teh u! Kei cha ei hra pato aw!
3 Hy ABEIPA, vâtlâhzy hry liata alyna bie cha hlâ aw na ta, phopi hry liata nâma reithaipa ta eisa aw.
4 Na zawngiahna cha avâ chô lâ taihta châ tlôh ta. na hmeihseihna chata avâzy taih khi pha hra ta.
5 Hy Khazohpa, nâ cha avâ chô lâ syulyu khita parôhnahsapa ta y mah y! Na rôhnahna cha leilô zydua chô liana heta palyupalihpa ta y hra mawh sy!
6 Na kyhpachâna zy he pachhapa ta ama y thei na hâh ta, na ku chachâh lâta pachha la, nâ chhy mah y!
7 Khazohpa ta a pathaihna liana chata he hawhna he reih ta: “Thapha aw na ta, Sekhe khih cha rai aw na ta, Sukô saikao cha ei rai hra aw.
8 Kilia râh cha kei eih châ ta; Manasera kei eih châ ta; Ephrai râh chhao ei luh hrôbiena châ ta; Zudah râh cha ei ryureina chôhchahrei a châ.
9 Môaba râh cha ei sina beih châ ta; Edôma râh cha ei pheiky byh a châ; Philistia râh cha ei aw sao aw.
10 Khihpi kuh a hneipa liana chata ahy e na chhihtha aw tly? Edôma râh liana chata ahy e nâ chhi aw?
11 Hy Khazohpa, nâ ta maniah pathlua va chi ma? Hy Khazohpa, eima zawpizy hnohta pua hra tlôh leipa chi ta.
12 Dyuhtuhpa zy lâta maniah bao mah y, chyhsapa baona cha khâpa hrao leipa dei châ tlôh ta!
13 Khazohpa zawhzi ta riahpha ngaitapa ta eima tao aw; ano cha maniah adyuhtuhpa zy a tlypa baituh awpa châ tlôh ta.