Abeipa tawhta nohhlaona zy vâta reithaina
Davi Reithaina Hla.
1 Hy ei thlahpa, ABEIPA cha reithai la; ei chhôh liata a ypa zydua saih u, a mo pathaihpa cha reithaih teh u!
2 Hy ei hrona, ABEIPA cha reithai la, a hmotao phapa zydua cha my khâ,
3 ano chata na hmoparaopa zydua angiahthai tyh ta, na pasana zydua patlâh tyh ta,
4 Khaotlôh tawhtapa na hrona cha chatlai tyh ta, kyhpachâ ngiachhiena nata tha pasana zy cha pakho tyh ta.
5 na pakah cha hmophapa ta lôhrâh cha patlô tyh ta, chatanachata na thyutliana nata thatlôna cha pahmôpi hawhta pathiehpa ta a y heih tyh.
6 ABEIPA chata pasaipa-ina a taopa zydua châta hmo siapa zy taopa ta a pachiapa tyh.
7 A siena zy cha Mawsi pahnosa ta, a hmotaopazy cha Izarel pathlazy pahnosa tyh hra ta.
8 ABEIPA cha tha pasana ta a biepa, ngiachhie thei ngaitapa, nôpha ngaitapa zawngiahna a hnei thlu thlâh hapa a châ.
9 Ano chata khâ ra leipa aw ta, a pathi-iana cha chhâzaw ta a vao aw vei.
10 Eima moleina zy hawhta eima chô liata tao leipa ta, eima hmoparaona zy hawhta viari maniah thô hra vei.
11 Avâ khi alei chô a sâh ngaitapa liata a ypa, ano a chituhpa zy chô liata a zawngiahna cha thata a châ;
12 nochhi nata notla â hlapa hawhna heta, eima hmoparaona zy eima tawhtapa pasie syulyu haw ta.
13 Paw ta a sawzy a ngiachhiepa hawhna heta, ABEIPA chata ano a chituhpa zy cha a ngiachhie tyh.
14 Eima pôhpa taona yzie he pahno ta; dohlei dei eima châ tahpa, a thei thlâh hapa vâta.
15 Chyhsa zydua a hro chhôh nohzy cha sibiepa hawhta châ ta; lyurâhpa pawpi hawhna heta pawh tyh ta;
16 thlih ta hmô ta a lei tyh, a yna chata pahno heih khao aw vei.
17 ABEIPA zawngiahna deikua cha ano a chituhpa zy chô liana chata, chhâzaw tawhta chhâzaw taihta y aw ta, a siana chhao ama sawzy chhâ taihta a y aw.
18 A biehrai a zyhpa maih zy nata a bie chhopa zy zo a chhuahpa ta athei thlâh hapa maih zy chô liana chata.
19 ABEIPA abeidyuchhai cha avâ zy lia khita pa-i ta, a khihnarâh chata a to chô liata ryu reih ta.
20 Hy a vâlyuhchâpa saih u, a bie nahthliepa ta a zyh tyhpa, thatlôna ta rôhnahpa saih u, ABEIPA cha reithai teh u!
21 A zawpi saih u, a khopa a tao tyhpa, a chakaotuhpa zy saih u. ABEIPA cha reithai teh u!
22 A ryureina su zydua liata a hmotaopa zydua saih u. ABEIPA cha reithai teh u. Hy ei thlahpa, ABEIPA cha reithai teh!