Daniel 12
Noh chhâna daihti
1 Cha daihti liana chata na zawpi sawzy a chakhei tyhtuhpa, hyutuhpa rôhnah ngaitapa Mikhael cha a duah aw ta. Atymâna daihti, phopi y tua no tawhta cha daihti taih chhaota a y beih leipa cha a vaw y aw; cha tina chata na chyhsazy cha pachhapa ta ama y aw, chyhsa to châbu liata moh ropa ta a ypa maih cha.
2 Chatawhcha ama hry liata chyhsa hluhpi alei buhchâ liata a mô hawpazy cha a vaw hra heih aw ei ta, thokha cha chhâzaw hrona lâta, thokha nozana nata chhâzaw mohnaona lâta.
3 Chatawhcha a sopazy cha avâ khaihpa hawhta khaih aw ei ta; chyhsa hluhpi siana lâta a paheisatuhpazy cha awhsi hawhta chhâzaw ta ama khaih aw.
4 Châhrasala nâ, Daniel y, bie cha nyu la, châbu cha khâchâ baipa teh, chhâna daihti taihta. Chyhsa hluhpi a râhrei aw ei ta, novâhnazy a pôh aw,” tah ta.
5 Chatawhcha kei Daniel chata kaw moh na ta, chyhsa hropa pano a vaw duah ei ta, pakha cha chavah ngiahkâ he lâta, a hropa cha chavah ngiahkâ hiakha lâta.
6 Chatawhcha ahy tlyma, poh rihdipa a bupa, chavah ti chô liata a ypa hnohta, “He hmonoâhpazy chhâna he khachâ e a châ aw?” tah ta.
7 Chyhsa poh rihdipa a bupa, chavah ti chô liata a ypa chata a ku chachâh lâ nata a ku chavei lâ avâ lâta pazawpa ta; ‘Daihti ei kha nata daihtizy nata daihti khophie chhôh a châ aw; mopathaipazy hmotaotheina cha ama paraopakei khai tita he hmo zydua he â ki aw,’ tahpa ta chhâzaw ta a hrohpa moh reipa ta chhie a sapa thei na ta.
8 Thei cha thei na ta, a pachâna deikua pahno va na. Chatanachata kei chata, “Hy ei beipa y, he hmozy chhâna cha khâpa a châ aw,” tah na ta.
9 Ano chata, “Daniel y, sie thlâh ha teh, bie cha khâchâ nyupa nata chahnaopa a châ haw, chhâna daihti taihta.
10 Chyhsa hluhpi cha âmosasyh ta a pathaipa ta a padisa aw ei ta, ama vaw pha aw; châhrasala chyhsa hmoparaopa zy chata molei ngaitapa ta tao aw ei ta; chyhsa moleipa ahy hmah ta a pachâna pahno leipa aw ei ta; chyhsa sopazy deikua chata pachâna ama pahno aw.
11 Chatawhcha raopa hlâna a y lymâpa pahleipa a châ nata roryhrana pasichhihpa paduasapa a châna tawhna chata, noh sâh kha nata sychaki a châ aw.
12 Hâ hualuapa ta noh sâh kha nata za thôh nata sythôh nata noh pangaw taih a tlohpa cha a nohlao na.
13 Châhrasala nâ cha chhâna taihta sie teh; nohzy chhâna liana chata a pahâ aw chi ta, na topa rakha liana cha na y aw,” tah ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | ||