1 “Cha tina chata, ABEIPA ta a tah, Zudah abei sahlao ruzy, abeisawzy ruzy, theihthaipa sahlao ruzy, hrohsopa sahlao ruzy, Zerusale liata a pahrâpa sahlao ruzy, ama thlâ tawhtapa la aw ei ta;
2 noh zy, thlâpâ zy avâ liata a ypa zydua kyh ama pachâpa, ama chakaopa, amâ chadaipa, ama tluapa, amâ chhypazy hmiakô liana chata amâ zawh aw; pakhypa châ khao leipa aw ei ta, pabupa châ hra aw veih ei; alei chô liata ie châta a châ aw.
3 He chhôhkha hmoparaopa pahlôhpa zydua ei papaina su liata siesaipazy chata, hro hlâta thi amâ tlyh via aw, Pheisaihzy ABEIPA ta a tah.
4 “Ama hnohta he tana heta na rei awpa a châ,ABEIPA chata he tana heta a tah: Chyhsa ama pao nata thyu heih aw veih ei ma? Chyhsa a sie nata vaw kua heih aw vei ma?
5 Khazia ma he Zerusale chyhsazy he hnôh lâ a sy ngâpa ta amâ sy pathla haw tly? Dôna khâchâ patu ei ta, kua hei khoh veih ei.
6 Nahthlie na ta thei na ta, ahy hmah ta bie dopa reih vei ei; Ahy hmah ta, ‘Khâpa ma ei tao haw tly?’ tahpa ta ama hmoparaona ro hra veih ei. Chyhsa to ta âmo lâpi lâ a heih chyu ei ta, adyuhna su liata arâ a thluah ngâpa hawh tlaita.
7 Avâ liata riasi chata a daihti zy pahno ta; sivia zy,” vawpô zy a daihtita liata vaw tlô tyh ei ta, ei chyhsazy deikua chata ABEIPA bieraopa pahno veih ei.
8 “Kheihta e, ‘A sopa eima châ, ABEIPA ryhpa bie eima hnohta a y,’ nama tah tly? Pachâ teh u, chârohtuhpazy kawlaw haithaipa chata haipa ta tlao ama tao.
9 Chyhsa sopazy cha nozapa ta, nomaohpa ta y ei ta, patupa ta ama y aw; pachâ teh u, ABEIPA bie cha thy ta, âmo liata khâpa sona ma a y tly?
10 Chavâta ama lahpinô zy cha mo hropazy hnohta pie aw na ta, ama lyuzy chhao a hneituh awpa zy hnohta, chyhsa to a chyh chaipa tawhta a rôhnah chaipa taihta uava a hmâhpa châ ei ta; hrohsopa tawhta theihthaipa taih chhaota, chyhsa to ta dâhmâhpa châ tlôh ei ta.
11 Ei sawchanô ei chyhsazy hmah cha a naota ta,‘A pha bao na, a pha bao na, ’tahpa ta reih ei ta, pha tlôh leipa ta.
12 Pasichhihna kyh ama tao nota ama no aza rai ma? Châ vei, ama no za vei; ama hmia chhie hra vei. Chavâta a paopa hry liata pao hra aw ei ta; âmo hrie tina chata thy pathlahpa ta ama y aw, ABEIPA ta a tah.
13 Âmo tawhta theilâpa pakhy khoh na ta, Krezôh zy pathei leipa ta, theiku kôzy pathei hra vei; a hna chhao uah ta, he hawhna heta ABEIPA ta a tah. He he âmo ei chhihthapa vâta hraotuhpazy ta âmo ama hraopa vâta.
14 Khazia ma eima tyuh thlâh ha tly? Apakhy ula, khihpi kuh a hneipazy liata a ngia ula, cha liana chata leidia ei suh u, ABEIPA chô liata eima molei hawpa vâta, ABEIPA eima Khazohpa ta châmaih ti maniah padosapa ta leidiana liata maniah a soh.
15 Thatlôna tlua pi ta, Khâpa hmah vaw tlô vei; patlâhna daihti awpa chhao, pachâ teh, thlahzona dei a châ.
16 “Ama arâ hnaphipa pyu cha Dana tawhta theipa châ ta; ama arâ chahrapa pyu liana chata râh pôhpalôhpa cha a chalyu ta. Vaw tlô ei ta, a chhôh liata a ypa zydua ama nie khai haw, khihpi nata a chhôh liata a pahrâpa zydua chhaota.
17 Parih nama hry liata tuah aw na ta, vâzi pangâh thei leipazy cha, chazy chata cha pachu aw ei ta, ABEIPA ta a tah.
Zudah nata Zerusale châta chaphôhtuna
18 Pachârôhna liana heta ei thlah ei palôh thei mawh sala, chhôhrih liana chata ei pathipalôh a panao haw.
19 Râh hlapapi tawhta ei sawchanô ei chyhsazy chapa ao cha, Zaio liana chata ABEIPA y vei ma? A chhôh liata ano Abei y vei ma? Khazoh nohthlahpa zyhpa ta nata pho hropa khazoh nohthlahpazy ta khazia e ei hie eina pahâh ei?
20 Sâhria noh a khô haw, nopi noh a chhâ haw,pachhapa ta y ma pi.
21 Ei chyhsazy ei sawchanô pasana liana chata pasa hra tlôh na ta, mâchhiesa na ta,thlahzona ta eina patu haw.
22 Kilia liata patlâhna thaw y vei ma? Cha liana chata patlâhtuhpa y vei ma? Khazia ei chyhsazy ei sawchanô a tlâh thei vei tly?