Zudah pathipalôh moleina ta ropa ta y ta
1 “Zudah moleina cha thua kawlaw nata lôna hmao pazaopa ta ropa châ ta; ama pathipalôh phiapa liata nata ama maisâh kizy chô liata a thupa ta a y.
2 Tho hrohpa thaby nata a byupazy liana chata ama sawzy ta ama maisâhzy nata ama Ashera zy cha a thei thlâh ha tlôh ei ta.
3 Hy, nâ lyu liata ei tlâh y, na râh zydua liata na moleina vâta na sôh nata na ryu zyduazy hraona châta na sâhpa suzy chhaota ei pie aw.
4 Nâ tlai cha na tovyuh ei cha piepa kha ky aw chi ta, na pahno beih leipa râh liana chata na khakhaipazy a chakaotuhpa ta ei cha tao aw, ei hiehâhna chata chhâzaw ta kâ awpa ta mei patih haw tlôh eichi ta.”
5 ABEIPA chata he tana heta a tah: “Chyhsapa ngâchhâpa ta chyhsapa bâh thatlôna ngâpa ta, ABEIPA a heisaina pathipalôh a hneituhpa cha chhiesapa ta y mawh sy.
6 Râhpathohpa liata chawhkaraipa su hawhta châ ta, hmophapa a pua awpa rai hmô aw vei. Râhpathohpa chawhkaraipa alô chhaolei, ahyhmah ta pahrâ leipa liana chata tlao a pahrâ aw.
7 “ABEIPA a ngâtuhpa a ngâchhâpa, ABEIPA a châpa deikua cha anohlao na.
8 Tizy kiapâh liata tho lohpa chavah kiah liata a thari a zawhpa, a lopa a vaw tlôpa chhao a chi leipa,a hnazy a hroh thlâh hapa, noh kâhpa kô papeisa leipa a chahôh beih leipa hawhpa he a châ aw,”
9 Pathipalôh he hmo zydua hlâta dô thaipa nata pasichhih ngaitapa châ ta; ahy e a pahno thei aw?
10 “Kei ABEIPA he chyhsa to ama yzie lymâ hawhta nata ama hmotaopa theilâpa lymâ hawhta pie awpa ta palôhrupa a motuhpa pathipalôh a pasiatuhpa ei châ.”
11 Chyhsa, a dona kyh châ leipa ta a hneirôhpa zy cha, bykheipa cha ano ti leipazy a tlôpa hawhta châ ta; a hro noh ta ano pathlua aw ei ta, a chhâna lâta cha ahrupa a vaw châ aw.
12 Eima su pathaihpa yna cha ryureina dyuchhai rôhnahpa cha hla tawhta pasasapa ta a ypa cha a châ.
13 Hy ABEIPA, Izarel hnabeiseipa, cha siesaituhpa zydua cha ama maohphyu aw; kei nâ heisaituhpazy cha dolei liata moh ropa hawhta ama lei aw, ABEIPA hrona tikhaoh cha siesai haw tlôh ei ta.
14 Hy ABEIPA, na patlâh la, patlâhpa ta ei y aw; na pachha la, chatanachata ei boh aw; ei cha reithai tyhpa châ tlôh chi ta.
15 Pachâ teh, ei hnohta, “ABEIPA bie khataih liata e a y? Vaw tlô se:” tah tyh ei ta.
16 Hmopha leipa patlôpa awpa ta cha tah leipa na ta,chhiena noh hra ei kho leipa na pahno; ei pakah bie reipa cha na hmiakô liata a y.
17 Ei châta chi a chhihpa châ khah y;nôpona noh liata ei pabohna na châ.
18 Na taolatuhpazy cha maohphyupa ta y ei sala, kei deikua cha maohphyu leipa ta; âmo cha thlahzopa ta y ei sala, kei deikua cha thlahzoh leipa ta, nôpona noh ama chô liata patlôsa la; thata pahleipadia mah y!
Pahânoh cha pathaisa awpa a châ
19 ABEIPA chata ei hnohta he tana heta a tah: “Vâtlâh sawzy kuh chhikao Zudah beizy ngiana nata puana, nata Zerusale kuh chhikao zydua liana chata a duah la,
20 ama hnohta; ‘Nâmo Zudah beizy, Zudah sahlao zydua, Zerusale liata a pahrâpa zydua, he kuh chhikao a ngia tyhpa saih u, ABEIPA bie he thei teh u.
21 ABEIPA chata he tana heta a tah: Nama hrona he a chado kaw teh u, pahânoh ta phao hnei khah ula, Zerusale chhikao liata a ngiakhei hra khah u.
22 Chatawhcha pahânoh ta nama o tawhta hmo phao nama puakhei awpa châ leipa ta, rai nama hria awpa châ hra vei, nama mahpawzy hnohta ei biepiepa hawhta pahânoh cha nama pathaisa awpa a châ.
23 Âmo deikua chata nahthlie leipa ta, ama nah pachôh hra veih ei, chhoreipa cha pahnopa ta ama tao leina awpa ta chhorupa ta tlao ama y.
24 “ABEIPA chata he tana heta a tah, ‘A papeisapa ta na nahthliepa ta pahânoh ta he khihpi kuh chhikao liata hmo phao a ngiakhei leipa ta, raihria leipa ta, pahânoh tlao nama pathaisa khiahtala,
25 he khihpi kuh chhikao liana heta, abeizy, Davi ryureina dyuchhai liata a tyu awpazy cha talailizy, nata arâzy liata kiapa ta a vaw ngia aw ei ta, âmo nata ama abeisawzy, Zudah mozy nata Zerusale liata a pahrâpazy chhaota; he khihpi he chhâzaw ta pahrâpa ta a y ha aw.
26 Zudah khihpi nata Zerusale chheipâh tawhta zy, Benzami râh tawhta zy, bypi râh tawhta zy, tlâh râh tawhta nata Neke tawhna zy ta a vy aw ei ta, raopa hlâna nata atheihnazy, niepa hlâna nata ropahâhpazy, reithaina atheihnazy, ABEIPA o lâna chata ama vaw cheih aw.
27 Châhrasala pahânoh pathaisa awpa nata pahânoh ta hmo phao leipa nata Zerusale kuh chhikao liata a ngiakhei lei awpa kyh liata eina nahthlie vei khiahtala, a kuh chhikao zy liana chata mei patih aw na ta, Zerusale o rôhnahpazy cha kâ khai aw ta, pachhaipa ta y aw vei.’”