Abeipa ta Zawba duahmo do leipa cha a pahnosa
1 Chatawhcha ABEIPA chata khisô aw ta, Zawba a chhy ta:
2 “Pahnona hlao leipa bie liata, chhosiena a pazosatuhpa he ahy e a châ?
3 Chapaw kawpa ta na chai a sai la, bie cha hiahri aw na ta, nâ chhy mah y.
4 “Aleilô bona ei bô nona khata khataih liata e na y? Na pahno thai khiahtala na chho mah y.
5 A laina zie ahy e a thlie na pahno tlai ma? Cha khiahtala a chô thliena ahy e a parai?
6 A bôna cha khataih liata ma pa-ipa a châ, ahyma a ki alô cha a bô,
7 Deiva awhsi zy hlasa pakhy nona khata, Khazohpa sawzy alypa ta ama awh nona kha?
8 “Tilaipi cha chhi tawhta a vaw pua nona kha ta, ahyma a ochhi a khaw;
9 a chysia châta meihdo zy ei tao nota. a pahlyna châta zohna chhakalupa.
10 a phana rakha awpa zy tao ta. a pakhâna nata a khaw nawpa chhao.
11 ‘He rakha deita he a vy la, Khoh cheita khâ, he liana heta na chatlaona rarôypa chhâ se’ ei tah?
12 “‘Na pi rakha tawhta my hnohta biepiepa ta, zovâthuana su he na pahnosa beih ma;
13 aleilô chy chhâna patu awpa ta nâ chu beih ma, Deiva awhsi chathô nawpa ta bie na pie thei ma? My cha chy chhâna.
14 Beihlei chanaohpa hawhta vaw tlôkhei awpa ta na pachu beih ma? Chatanachata chysia rôh thlapa hawhta a châ.
15 Deiva awhsi khaihna cha chhupa châ ta, a ry liata awhsi hropa cha miakha miakhata ama lei lymâ.
16 “Tilaipi hnawh zy liata a ngiapa ta, â thuna zie na chahryh khai ha mâ?
17 Thina chhikao cha na ota paluahsapa a châ ma, thina chhikao zohkaluhpa cha na hmô beih rai ma?
18 Alei a kawhna zie he na pahno pha ma? Na pahno khai khiahtala reih khai ha teh.
19 “Khaihna pahrâna su lâpi cha khataih liata e a y, zohkaluhpa su chhao cha khataih ta e,
20 a yna su lâ cha chhihthapa ta, a o lâna cha nâ chhi thei aw ma?
21 Na pahno tlai aw na, cha liana chata pih chi ta, na nohzy chhao a hluh kaw mâ tâh!
22 “Dâhaw sopakhyna liata nâ ngia beih ma, pareih sopakhyna su na hmô beih ma,
23 atyhreina daihti châta nata, adyuhna nata chariahna châta ei khaipa cha?
24 Khâpa lâpi ta e, khaihna he pachhaipa ta y ta, khataihta e, alei chô liata nochhi ziza a pai patla?
25 “Ahyma avâkatlâ châta a sai nahta, pachie châta a lâpi taopa tly,
26 ahy hmahta y leina liata avâ pasuasa ta, râhpathohpa chyhsa y leina su liana khata;
27 lyurâh chawhpa nata alei chhiepa padâpa ta, sibiepa hrohpa a papyusa tly?
28 “Vâsua heta paw a hnei ma. adiah he ahyma a sa tly?
29 Ahy chhi tawhta e, tikuapa he a vaw pua, avâ tawhta dâhaw a za tla tyhpa khi ahyma a sa?
30 Ti chhao cha alô hawhta châkarô ta, athuh ngaitapa hmia chhao a kua hra.
31 “Awhsicharu khi na chahry thei aw ma, vaothawlapiapa khi na pathla thei aw ma?
32 Mizaraw khi a daitita liata nâ chhi thei ma, chavyh cha a taw chhaota nâ chhi thei aw ma?
33 Avâ hmo raopazy na pahno ma? alei liana heta a biehneina na paduasa thei aw ma?
34 “Avâ thata cha phy awpa ta, avâ liata meihdo zy khi na aw thei aw ma?
35 Dôhla zy siepa ta, ‘He liana heta eima y,’ tah awpa ta na tuah thei ma?
36 Ahyma meihdo hryna khita a sona kaw soh ta, ahyma awhsi a zawpa zy pahno thaina a pie?
37 Ahyma a sona ta meihdo zy khi a reih thei? Ahyma avâ tithei patlai thei aw,
38 dohlei a pahly pakhypa ta a li hlâ lei cha, baotlâ tlo lâta a chatliepa ta a pahlypa na tah vei ma?
39 “Chakeibarohneipa chata niepa tluapa ta, chakeibarôhneipa dawpa zy chata aoh lôhrâ na patlô thei ma,
40 ama lôpu liata a byupa ta, niepa ama hâ thlâh nozy khata?
41 Ra-awh a taw niepa a phahla ta, Khazohpa lâta sâh ta, a khie ngâ nota ahy e niepa a pie?