Zawba cha Khazohpa ta ano phuh a la aw tahpa a ngiapâna
1 Chatawhcha Zawba chata a chhy ta:
2 “Khachâ e, ei rie na patheisa aw eichi ta, biezy ta eina tu aw eichi tly?
3 Ei hluhpi tlai na pachhie pahru eichi ta, pha lei ngaitapa ta ei chôta nama tahpa he nama noza vei mâ?
4 Hmo ei vaw taopasi hawpa khiah cha, ei taopasina hmo cha keimasasyh lia tlaita a y aw.
5 Ei chô liata a palaisapa châpa ta, ei raona kyh he a eina châta a hmâpa nama châ khiahtala,
6 pahno ula, Khazohpa ta su leipa ta na pachâsa ta, a sao ta eina pahly hih.
7 Tha chahra ta!’ aw na ta. châhrasala nâ chhy vei; ao paro ngaitapa ta pado na ta, châhrasala siana rai y vei.
8 Ei lâpi cha na chahry khâh ha ta, khoh thei va na, ei lâpi zy liata zohna ta a khu haw.
9 Ei rôhnahna na pahluhpa ta, ei luh liatahpa lakho cha la ta.
10 Kyh to liata na parao ta, ei lei haw, ei hnabeiseina cha tho hawhta phiapathla haw ta.
11 A pathi-iana kei chôta pakâsa ta, a chariahpa hawhta eina mo haw.
12 A pheisaih sahlao pahmaoh pakhy ta; keima lâta na thyuhnao ei ta, ei poh-o cha eina dôh khai ei.
13 “Ei unawhpa zy cha kei tawhta pahlasa ta, ei hmia pahnopa zy chhao a cha-uapa a vaw châ khai haw.
14 Ei heinawh nata ei viasa lôhkhypa zy chhao na pathlua ei ta;
15 ei o liata khichhaipa zy ta na my ei ta; reikah phapa hmâpa ta ei aw awpa a châ.
17 ‘Ei lahpinô chata ei roh chhie ha ta, ei pilâhpa zy châta pasichhihpa ei châ.
18 Sawnawhpa zy chhao taih na mohnao ei ta, ei duapa he na diah ei ta.
19 Ei viasa lôhkhypa zy ta na pasi ei ta, ama kyh ei pachâ tyhpa zy khata einâ hei hnao ei.
20 Ei ru he ei vo nata ei sapa liata a bai ta, ei hâh vo deita pabohsapa ta a châ.
21 Hy ei viasa saih u, na ngiachhie teh u, na ngiachhie teh u, Khazohpa ku ta eina hria haw hih!
22 Khazia e, Khazohpa hawhta na pachhipary eichi ta? Ei sapa pasa taona he â daih nama tah vei tly?
23 Aw, ei biezy he ropa châ mawh sala! Châbu liata zy ropa châ ha tlai sala!
24 Thua châsôh nata kyh ta alôpanô liata chhâzaw châta chapaipa châ tlai sala!
25 Na chakheituhpa a hro thlâh haw tahpa ei pahno, ano cha noh chhâna noh liata ryureina liana chata einâ duakhei aw;
26 ei vopa cha leidia khai hrasala, cha tawhna cha ei sapa ta Khazohpa ei hmô tlai aw,
27 ano cha hmô tlai aw na ta, ei mo ta hmô aw na ta, chyhsa hropa châ leipa ta. Ei palôhrupa tha liahsa a zei ha na.
28 Ano cha kheihta e eima taola thei aw?’ tahpa ta, ano liata hmo thabypa tlua tlôh eichi ta,
29 zaozi nâmo lâ a heihpa cha chi ula, zaozi chata moleina zydua pathai tlôh ta, ryureina a y tahpa nama pahno theina awpa ta,” tah ta.