Khazopa ta a chôta hmo a patlôsapa zy vâta Zawba reipasipasuana
1 Chatawhcha Zawba chata a chhy ta:
2 “Cha hawhpa hmo cha a hluhpi ei pahno; nama zydua ta thlahpalôhtuhpa ngiaroh pachhih ngâsâpa nama châ.
3 Bie hraoleipa zy chhâna a hnei aw ma? Cha khiahta khâpa ma cha pareisa ei ta namâ chhy?
4 Kei chhao nâmo hawhta ei reih thei hra, keima hawhna heta duah châ hra ula. nama chô lâta biezy chata reih thei hra aw na ta, ei luh chhao ei cha chahuah thlu thei hra ei.
5 Ei bie chata tha cha patlô thei aw ei na ta, ei hmao ta thlahlôhna bie ta nama pasana a patlâhsa thei aw.
6 “ 'Reih hra aw sala, ei pasana he tlâh via hlei aw va na, a chalih hra aw sala, khâpa e ei phahnaina a y tly?
7 Khazohpa ta ei rie na patheisa tlaita; ei viasa zydua cha eina pathluasa he zaw.
8 Ano chata na patupakhi ta ei zaona heta na leih ta; cha tlai cha ei hmiakô ta eina pahnosa.
9 A pathi-iana ta na hriechhei ta, eina taola; ei chô liata a hâh charieh ta; nâ dyuhtuhpa ta ei chôta a mo na khai hnao tlôh ta.
10 Ei chô liata ama pakah â ei ta, mohnao ngaitapa ta ei baih liata na chabaih ei ta, kei cha a pahmaohpa ta eina siehnao ei.
11 Khazohpa ta khazoh pachâ leipa ku liata na hlâ ta, hmoparaopa zy ku liata eina thy.
12 Phasa ngaitapa ta y na ta, ano ta na pachhaih khai haw ta; ano ta ei rao ta na la ta na pachhaih khai haw ta; châka a nuapa châta na tao ta,
13 ali kathaipa zy chata na chadô khai ei ta. ei lôpo zy patlaw chhei ta chado veih ei, alei chô liata ei hmôkhaw a leitha.
14 Raona chôta raona ta na parao ta; chariahpa hawhta ei chôta eina siehnao.
15 Ei vo chô liata latho poh bie na ta, ei tha cha buchâh liata ei soh.
16 Ei chana ta ei hmia saih ta, ei mo vo liata thina nohpahli a y;
17 Ei kuzy liata tah raruahna y leipa ta, ei thlahchhâna cha a pathaih.
18 ‘Hy aleilô y ei thisaih cha khu leipa la. ei chapa heta a pahâna su hnei khah se,
19 A tahmâ chhao he avâ liata ei bie pahnotuhpa ama y, na pahnokheituhpa cha vâ chô sâhpa liata a y.
20 Ei viasazy chata na mohnao ei ta; Khazohpa lâta ei mothlih a tla,
21 thlah na chhâpa awpa ta thokha khoh na ta, chyhsa ta a viasa châta a hia tyhpa hawhta.
22 Kô chyhta a lei tita, ei kua khao leina awpa lâpi cha a chhih tlôh awh na ta.