Zawba 11
Zôpha ta Zawba he a moleipa tlai a châ a tah
1 Chatanachata Naama chyhsa Zôpha chata a chhy ta:
2 Bie he zydua he achhy lei thei awpa ma a châ? Chyhsa reih hluhpa ta thai a châ aw ma?
3 Na palaina bie heta chyhsa a chalihsa aw ma? Thai lei ngaitapa ta na reih nona heta ahy hmah ta na no pazasa aw vei ma?
4 “Ei ngiapâna he a do ta, na mohmô liata ei pathaih na,’ tah tlôh chi ta.
5 Khazohpa deikua tlai chata bie a za reih maw sala, na chô liata a pakah vaw a tuah sala,
6 a sona bieparu cha pahnosa tlai sala! Pahno awpa ta noâhchhih ngâsâpa châ tlôh ta. Chavâta na hmoparaona hlâta anai viapa ta Khazohpa na chô liata a tahpa he pahno châh chi.
7 “Khazohpa liata hmozy a thuh zie na hmô thei ma? Atotaotheipa cha na hmô paki thei ma?
8 Avâ hlâta a sâh viapa a châ, na khâpa e na tao thei: Sheol hlâta a thuh viapa cha na khâpa e na pahno thei?
9 Athliena cha alei hlâta seih via ta, tilaipi hlâta a kawh via.
10 Sie palâh ta, thokha lô-o liata a patâh khia cha, Nâ ta pachia awpa ta a chhi khiah cha ahy e a pakhâ thei tly?
11 Chyhsa leilôpa cha pahno tlôh ta: tlua hra vei sala, hmoparaopa zy cha hmô aw vei ma?
12 Chyhsa hrupa chata a sopa a tlô thei aw ma? Lyurâhpa alâ taw cha chyhsapa lâta a lie thei aw ma?
13 Na pathipalôh ta liahsa na pachâ tita, ano lâta na kuzy cha na pazawh aw.
14 Na ku liata hmoparaona a y khiahta cha, so pathlah la, na poh-ozy liata sia leina pahrâ leipa sala.
15 Cha tina chata seina hnei leipa ta hmiakaipa ta na y aw; a i aw chi ta, chi aw va chi.
16 Na rietheina my tlôh aw chi ta, ti lohpa a leipa hawhta na thei thlâh ha aw.
17 Na hrona cha nohchhô hlâta a khaih via aw; zohna chhao y hrasala, my hawhta a châ aw.
18 Thlahlôh ngaitapa ta y aw chi ta, hnabeiseina a ypa vâta; mohmia pasaih aw chi ta, a bohna liata nâ pahâ aw.
19 A zia aw chi ta, ahy hmah ta cha pachisa aw veih ei; chyhsa hluhpi ta ama cha papyupahly aw.
20 Châhrasala moleipa mokhaoh cha zoh aw ta; a râna awpa lâpi rai hnei aw veih ei, ama ngiatiah leina cha thlahpa pathliena a châ aw,” tah ta.