Hmo thiehpazy kyh chhochhieliena
1 Hy Zakaw chhôhkhapa, Izarel sahlao mo tah awpa, Zudah tizy tawhta pua ta; hmeihseihna liata châ tlôh leipa ta, siana liata châ hra tlôh leipa ta, ABEIPA moh reipa ta chhiesapa ta Izarel sahlao Khazohpa padotuhpa zy saih u, he he nahthlie teh u.
2 Khihpi pathaihpa liatahpa a tah tyh tlôh ei ta, Izarel sahlao Khazohpa chô liata ngâna ama pahnieh hra; a mo cha Pheisaihzy ABEIPA a châ.
3 Cha hlâta hmozy cha hlâno tawhta reih na ta, ei pakah tawhta pua ta, pahnosa na ta; sôkha ta patlô na ta, vaw tlô ta.
4 Chhorupa châ eichi ta, nama rao cha thua tha châ ta, nama khi cha dawh a châpa ei pahnopa vâta,
5 hlâno tawhta nama hnohta reih na ta, a vaw tlô hlâ chhaota nama hnohta ei cha pahnosapa kha, chata leipa ta cha nâma ta, Ei khazoh nohthlahpa châta a tah, nâ ta ei khazoh nohthlahpa a taopa nata khazoh nohthlahpa leipa chata bie a pie, nama tah pathlei aw na.
6 “Nama pahnopa kha he zydua he moh teh u; nâmo ta reih aw vei eichi ma? Atahmâ tawhta hmo thiehpa ei cha pahnosa aw ei, hmo a nyupa nama pahno beih leipa zy cha.
7 Chazy cha hlâno tawhta taopa châ leipa ta atahmâ ta taopa châ ta: atanoh hlâna khata nama nahkhao ta thei beih vei eichi, chata leipa ta la, ‘Pachâ teh, chazy cha eima pahno thlâh ha mâ tâh,’ nama tah pathlei aw na.
8 Nama nah ta thei beih leipa eichi ta, nama palôhrupa ta pahno beih hra veih eichi; hlâno tawhta nama nah cha pachôhpa ta y beih vei, piehpie ngaitapa ta nama tao tyh tahpa nata chhi tawhta taopasituhpa ama châ tah tyhpa pahno tlôh na ta.
9 Ei cha pahleipadia leina awpa ei ta, ei moh vâta ei hiehâhna cha ei pakhei chy aw, reithaina ei to thei nawpa ta nama chô liata ei mao-oh aw.
10 Moh teh u, ei cha pasia ei, Châhrasala tâkâ pasiana hawhta châ vei; rietheina patisana mei liana chata ei cha pasia ei.
11 Keimasasyh vâta, keimasasyh vâ tlaita ei tao aw, ei moh he khazia e pachhiepa ta a y aw? Ei rôhnahna he mo hropa hnohta pie aw va na.
Abeipa ta Izarel a chatlai nawpa zie
12 Hy Zakaw sahlao nata ei awpa Izarel sahlao saih u, ei bie nahthlie teh u! Kei he ano cha ei châ, a hmiatua chaipa nata, a hnôh chaipa ei châ.
13 Ei ku heta leilô bôna cha bô ta, ei ku chachâh lâ heta avâzy khi parai ta; ei aw pata nahta amâ duah tyh.
14 Nâmo sahlao zydua saih u, apakhy ula, nahthlie teh u! Ama hry liana chata ahy e he hmozy he a reih beih tly? ABEIPA ta kyh a pachâpa chata Babylaw chô liata a khona zie tao aw ta, a bâh cha Kaldia sahlao chô liata hypa ta a y aw.
15 Kei, keima tlai heta bie ei reih haw; ano cha aw na ta, a chhi na ta, a lâpi cha a nohhlao lymâ aw.
16 Nâmo sahlao heta na vaw hnia ula, he he nahthlie teh u: cha hlâ tawhna khata a ru lâta reih beih leipa na ta, a y tuana tawhna khata cha liana chata ei y,” tahpa ta. Atahmâ ABEIPA Khazohpa chata keima nata a Thlahpa cha na tuah haw ta.
17 ABEIPA nâmo Chatlaituhpa, Izarel sahlao Mo Pathaihpa chata he tana heta a tah: Kei he ABEIPA nama Khazohpa, nama phana awpa ta nâmo pachutuhpa, nama siena awpa lâpi liata châ chhituhpa cha ei châ.
18 Hy nâmo heta ei biepiepazy cha nama nahthlie ha mawh sala! Nama chô liata adyhna cha chavah hawh tlaita ypa ta, nama siana cha tilaipi chalâparâpa zy hawh tlaita a y awpa;
19 na pathlazy chhao sadi zie ta ypa ta, nama chhi theizy sadi dohlei zie ta ama y awpa; ama moh cha ei hmiakô tawhta phiepa ta y leipa aw ta, pahleipadiapa ta y hra aw vei,” tahpa ta.
20 Babylaw tawhta pua ula, Kaldia sahlao cha a râsai teh u, he he hla sapa pyu ta pahnosa ula, kaokih taih chhaota parosa ula;” ABEIPA chata a chakaotuhpa Zakaw sahlao a chatlai haw!” tah teh u.
21 Leisadi su zy liana chata a chhihtha nona khata ama dâh phi leipa ta; lôpanô tawhna chata âmo chata tizy palosa ta; lôpanô pakei ta, tizy thata vaw pua ta.
22 ABEIPA chata, “Moleipazy châta thlahlôhna rai y vei,” tah ta.