Pachhana nata vânohtona châta thlahchhâna
Davi Reithaina Hla.
1 ABEIPA, ei lôpanô cha reithaipa ta y mawh sy, ano chata ei kuzy he adyuhna pachu tyh ta, ei ku parohzy he adyuh awpa ta a pachu tyh;
2 ei kyhpachâ ngiachhiena nata ei kuh, ei o sâhpa nata na pabohtuhpa, ei vyhphao nata ei ngâna pahniehna, ei ry liata ei chyhsazy a panawh tyhtuhpa cha a châ.
3 Hy ABEIPA, chyhsapa he khâpa ma châ ta, na pahno tyh tly, chyhsa sawchapawpa chhao he khâpa ma châ ta, na pachâ tyh tly?
4 Chyhsapa he hrao leipa dei châ ta, hro chhôh nohzy cha nohpahlipa a lei tyhpa hawhna he a châ.
5 Hy ABEIPA, na vâzy pabohpa ta za chô la! Tlâhzy cha hria mah y, chatanachata a khu a pua aw!
6 Dôhla pathliesa la, âmo sahlao cha papai mah y, na châtai zy cha ka la, thata paty pamâ mah y!
7 Chôlâ tawhta na ku za paza la, na pachha la, ti hluhpi tawhtapa zy he na pachha mah y, khichhaipazy ku tawhtapa he,
8 ama pakah chata bie hrao leipa reih tyh ta, ama ku chachâh lâ cha ku chachâh la a do leipa a châ.
9 Hy Khazohpa, nâma palyupalihpa ta hla thiehpa sa aw na ta; tlaipi ri hrawh a hneipa ta nâma reithaipa ta ei sa aw,
10 ano cha a cha, abei sahlao hnohta pachhana pie ta, zaozi chyhsa a parao theipa tawhta a chakaopa Davi a pachhatuhpa cha.
11 Na pachha la, khichhaipazy ku tawhtapa na pachha mah y, ama pakah chata bie hrao leipa reih tyh ta, do leipa a châ.
12 Eima sawchapawzy ama thyutlia nota tho chhy hawhta laiseihpa ta, eima sawchanôzy chhao a rôhnahpa yzie ta a ki lôzy hawhta ama y tita;
13 eima sawvâzy a biepa ta hmo to rai y hôlôpa ta; eima mietahkupazy chhaota sâh hluhpi, a thy hluhpi ta eima sibiepa suzy liata ama patawh tita;
14 eima viahchaozy a vo châ ngaitapa ta, paraona tyh leipa ta patawh pasi leipa ta; eima othliahzy liata awna pyu rai a y vei tita!
15 Cha hawhna chata a ypa chyhsazy cha aly ngaitapa ta y tyh ei ta! ABEIPA Khazohpa ta a hneipa chyhsa zy cha aly ngaitapa ta ama y tyh!