Moleina tawhta aboh nawpa ta thlahchhâna
Davi Reithaina Hla.
1 ABEIPA, ei cha pado hih; kei lâta a vy patoh la! Ei cha pado nota ei ao lâna heta na nah pachôh mah y!
2 Ei thlahchhâna he khâpa leipa rohpahâhpa hawhta na hmiakô liata papuapa ta y sala, ei ku chalopa he zâlâ atheihna hawhta y mawh sy!
3 Hy ABEIPA, ei pakah thaby liana heta vaihtuhpa patyusa la, ei hmao ochhi he vaih mah y!
4 Hmo moleina hmozy ei pathipalôh paheisa khah la, hmoparaopa chyhsa zy taokhei awpa chata, ei pathipalôh he hmopha leipa rai lâna chata paheisa kha la; ama niepa pahâh ngaitapa zy cha na paniesa khah y!
5 A siapa chata na tu se, ngiachhiena a châ aw, na chhorei se, luh liata sathaw thupa hawhta a châ aw; ei luh ta khoh leipa ta y kha se, ama moleipa chhaota thlahchhâ lymâ tlôh aw na ta.
6 Ama pachiatuhpa zy cha lôpanô kâ lâta thy pathlahpa ta y ei ta, âmo chata ei biezy ama nahthlie ha aw, thlôh tlôh ta.
7 Chyhsa ta alei palie ta, a pazaopa hawhna heta, eima ruzy he thlâ kiah liata hie pathlahpa ta y ta.
8 Hy ABEIPA Khazohpa, ei mo ta nâ lâta moh tyh tlôh ta; nâma liana chata ei ngâna ei pahnieh tyh; ei hrona he roryhrapa ta siesai kha y!
9 Ei aona châta khohei ama chôpa tawhna chata na hrôbieh mah y, hmoparaopazy khohei tawhna chhaota!
10 Kei ta ei sie pakhô no tlaita hmoparaopa zy cha âmo saozy liana chata pao ei se.