Hlazy 132
Achhyna-o chôta byhnâ pie awpa ta thlahchhâna
Khyna Hla.
1 ABEIPA, Davi cha a riethei taona zydua a thei mah y;
2 ABEIPA lâta chhiesapa ta, Zakaw Thatlôpa hnohta bie a taihzie kha,
3 “Ei yna o liata a ngia chachei leipa aw na ta, ei rakhô liata kiah hra aw va na;
4 ei mozy he, paso pasaih leipa aw na ta, ei mo vozy he paso pasaih hra aw va na.
5 ABEIPA su awpa ei hmô hlâ lei cha, Zakaw Thatlôpa yna awpa cha,” tahpa ta.
6 A bie cha Ephratha liata thei pi ta, râhhmahpa sibiepa su liana chata hmô haw pi ta.
7 “A byureih zy liana chata a ngia aw pi ta, a phei tlyna thaby liana chata eimâ chhy aw!” tahpa ta.
8 Hy ABEIPA, thyu la, nâ pahâna su awpa liana chata a ngia mah y, nâ nata na thatlôna Byh chhaota.
9 Na theihthaipazy cha siana ta a tobi ei sala, na mopathaipazy cha thaphapa ta rahao ei se.
10 Châ chakaopa Davi nata na sathaw thupa hmia cha pakuasa khah y.
11 ABEIPA chata Davi hnohta hmeihseihna kyh ta chhie sa haw ta, cha cha a heisai aw vei: “Na pôhpa thei liatahpa na beidyuchhai liana chata ei patyusa aw.
12 Na sawzy chata ei biehraipa nata ei pahnosapa âmo ei pachu awpa cha ama zyh khiahtala, ama sawzy chhao chhâzaw ta na beidyuchhai liana chata amâ tyuh lymâ aw,” tahpa ta.
13 “ABEIPA chata Zaio cha a tlyh tlôh ta; pahrâna châta khoh ta:
14 “He he chhâzaw châta ei pahâna su awpa a châ; he liana heta ei pahrâ thlâh ha aw, ei khozie châ tlôh ta.
15 A nie awpa cha byhnâ thata aw na ta, a sipasapazy cha viahchhâ ta lôhrâ ei patlô aw.
16 A theihthaipazy cha pachhana ta tobi aw na ta, a mopathaipazy cha thaphapa ta ama rahao aw.
17 He liana heta Davi pathlazy hry liatahpa cha abei hmotaotheipa ta ei tao aw; ei sathaw thupa meiôh cha a khaihpa ta ei rao aw.
18 Ano khakhaipazy cha maohphyuhna ta tobi aw na ta, ano chô liana chata a lakho cha thlaraw a sie aw,” tahpa ta.