Abeipa Ryhpa phana zie
1 Ama lâpi liata pha pakipa chyhsa zy cha ama nohhlao na, ABEIPA ryhpa a chhihtuhpa zy cha!
2 A bie pahnosapa zy a zyhtuhpa zy cha ama nohhlao na, pathipalôh zydua ta a tluatuhpa zy cha,
3 âmo chata sia leina rai tao leipa ei ta, a lâpi zy liana chata ama sie tyh!
4 Nâ ta na chhoreina biezy cha biepiepa ta maniah pie chi ta, phahnai khoh ngaitapa ta eima zyh theina awpa ta.
5 Na bieraopazy cha zyh awpa ta ei yzie zy he pa-ipa ta a y mawh sala!
6 Cha tina chata maohphyuh leipa aw na ta, biepiepa zydua ei papeisa tina chata.
7 Pathipalôh a do ngaitapa phaopa ta alyna bie ei cha hlâ aw, na pachiana siapazy cha ei chu tina chata.
8 Na bieraopa cha ei zyh aw na; na pathlua khah y!
Abeipa Ryhpa lâta reingiana
9 Thyutliapa ta kheihta e a yzie a pathai aw? Na bie lymâ hawhta a yzie a phapa ta vaipa ta.
10 Ei pathipalôh zydua heta cha tluana ta; na biepiepazy ei siesai awpa pasaih cheita khah y!
11 Nâ lâta moleina ei tao lei nawpa ta na bie cha ei pathipalôh liata pachô na ta.
12 Hy ABEIPA, na nohhlao na; na bieraopazy cha na pachu mah y.
13 Na pakah liata na pachiana zydua cha ei hmao ta ei pahnosa haw.
14 Na bie pahnosapa siena liana chata ei thapha ta, hneirôna zydua liata ei thaphapa haw tlaita.
15 Na chhoreina biezy cha pachâ aw na ta, na lâpizy cha ei papeisa hra aw.
16 Na bieraopazy chô liana chata aly aw na ta; na bie cha my aw va na.
Abeipa Ryhpa liata thaphana
17 Ei hroh thei nawpa ta châ chakaotuhpa chô liana heta, a pha ngaitapa ta tao mah y, chatanachata na bie ei zyh aw.
18 Na ryhpa bie tawhta hmonoâhpa ei hmô theina hâh ta, ei mozy he na pavâsa mah y.
19 Alei liana heta khichhaipa châ na ta; na biepiepa zy cha kei tawhta phih khah y!
20 Ei hrona he kei chheipa ta y ta, khati no raita na pachianazy avâpa vâta.
21 Apalaipa chhiesapa zy cha ra chi ta, na biepiepa zy a paviasai tyhpa zy cha;
22 reipachhiena nata nawhtawna he kei tawhta pahlei mah y, na bie pahnosapa zy cha zyh tlôh na ta.
23 Abeisawzy chhao atyuh ei ta, reipasipasua ei ta, châhrasala châ chakaopa heta na bie raopazy cha tlao a pachâ.
24 Na bie pahnopazy cha ei lyna châ ta, aryhna na rao patuhpazy chhao a châ.
Abeipa Ryhpa lâta achhuahna
25 Ei hrona he dohlei liata khâchâ a bai ta; na bie lymâ hawhta na pahra mah y!
26 Ei yzie zy cha cha pahnosa na ta, nâ ta nâ chhy chi ta; na bieraopazy cha na pachu mah y!
27 Na chhoreina kyh cha na pahno thaisa mah y, chatanachata na hmonoâhpa taopa kyhzy cha ei pachâ aw.
28 Ei hrona he pachârôhpa vâta a zao tyh; na bie lymâ hawhta tha na patlô mah y!
29 Yzie do leipa he ei tawhtapa pasi la; na ryhpa bie ngiachhie ngaitapa ta na pie mah y!
30 Yzie ngâchhihpa a tlyh na ta, na pachianazy ei hmiakô liata paysa na ta.
31 Na bie pahnosapa zy liana heta khâchâ a bai na ta; hy ABEIPA, na pamaohphyusa khah y!
32 Na biepiepa lâpi liana chata ei râ aw, ei pathipalôh he na pakawh tina chata!
Pahno thai nawpa ta thlahchhâna
33 Hy ABEIPA, na bie raopa lâpi cha na pamosa mah y; chatawhcha a chhâna taihta ei chhi aw na.
34 Pahno thaina na pie mah y, chatanachata na ryhpa bie cha a phapa ta ei vao aw na, ei pathipalôh zydua heta ei zyh aw.
35 Na biepiepa lâthlôh liata na pasiesa mah y, cha liana chata aly tlôh na ta.
36 Na bie pahnosapa lâna chata ei pathipalôh he paheisa mah y, karâ-yna lâta châ leipa ta.
37 Ei mo he hmo hrao leipa mona tawhta paheisa la; na lâpizy liana chata na pahrosa mah y.
38 Na bie cha châ chakaopa lâna heta pa-isa mah y. Cha cha nama china liatahpa a châ.
39 Eina reipachhiena ei chipa he pahlei mah y; na pachiapazy cha pha tlôh ta.
40 Na chhoreina biezy cha pahno byuh tyh na ta; na siana vâta na hrona na pie mah y!
Abeipa Ryhpa liata pahniehna
41 Hy ABEIPA, na zawngiahna zy cha kei lâta a vy mawh sy, na pachhana tlai cha, na bie lymâ hawhta;
42 chatanachata na reipachhietuhpa achhyna awpa ei hnei aw, na bie ngâ tlôh na ta.
43 Hmeihseihpa bie cha ei pakah tawhta la khai khah y, na pachianazy cha ei hnabeiseih tyh tlôh ta.
44 Na ryhpa bie cha khâ ei zyh aw, chhâzaw nata chhâzaw ta;
45 khotalaipa ta ei charei aw, na chhoreina biezy cha tlua tlôh na ta.
46 Na bie pahnosapa biezy cha abei sahlao hmiakô liata reih aw na ta, ei noza aw vei;
47 na biepiepa ei pasôpa chô liana zy chata ei ly aw.
48 Na biepiepa ei pasôpa lâna chata, ei kuzy pazawh aw na ta, na bieraopa zy cha ei pachâ aw.
Abeipa Ryhpa liata ngâna
49 Cha chakaopa lâta bietai cha a thei thlâh ha mah y, nâ ta hnabei eina paseihsapa vâ chi ta.
50 Cha cha ei rietheina liata chhao ei thlahlôhna a châ. na bie chata na pahro haw tlôh ta.
51 Apalaipazy chata thata na pahneisao ei ta, châhrasala na ryhpa bie cha tleisai vana.
52 Hy ABEIPA, hlâno ta na pachiapazy cha a thei thlâh ha na ta, thlah ei palôh tyh.
53 Palôh châ leina thata heta na tlô thlu ta, hmoparaopa na ryhpa bie a siesaituhpa zy vâta.
54 Ei khitlyna o liana heta, na bieraopa zy cha ei hla a châ tyh.
55 Hy ABEIPA y, zana chata na moh athei thlâh ha tyh na ta, na ryhpa bie chhao ei zyh tyh.
56 Chazy cha hnei na ta, na chhoreina bie cha a phapa ta ei vaopa vâta.
Abeipa Ryhpa lâta ahlâna
57 ABEIPA cha ei vyuhna a châ; na bie ei zyh aw tahpa ei rei hawpa kha.
58 Ei pathipalôh zydua ta na ngiachhiena a haw na ta; na bie lymâ hawhta na ngiachhie mah y.
59 Ei yzie zy pachâ na ta, na bie pahnosapa lâna chata ei phei chakâ haw na ta;
60 na biepiepazy zyh awpa ta a parah na ta, hawh va na.
61 Hmoparaopa sahlao khawhrizy chata na chazei hôlô thlâh ha ta, na ryhpa bie cha my va na.
62 Zâcho ta alyna bie hlâ awpa ta ei thyu aw, na pachiana siapazy vâta.
63 Châ chituhpa zydua nata na chhoreina biezy zyhtuhpa viasa ei châ.
64 Hy ABEIPA, alei he na zawngiahna ta a bie; na bie raopazy cha na pachu mah y!
Abeipa Ryhpa sôhna
65 Hy ABEIPA, na bie lymâ hawhta châ chakaopa he a phapa ta na tao tyh
66 Pachiana phapa nata novâhna na pachu mah y, na biepiepazy cha ngâ tlôh na ta.
67 Riepatheipa ta ei y hlâna khata pavia tyh na ta; atahmâ deikua chata na bie ei zyh haw.
68 Nâ cha pha chi ta, hmophapa tao hra chi ta; na bieraopazy cha na pachu mah y.
69 Apalaipazy chata ei chô liata haipa reih ei ta, ei pathipalôh zydua heta na chhoreina biezy cha a phapa ta ei vao aw;
70 ama pathipalôh cha rihri thaw hawhta thawh ta, kei deikua cha na ryhpa bie chô liata ei ly tyh.
71 Na bieraopazy cha ei chu thei nawpa ta, riepatheipa ta ei vaw ypa cha a pha na.
72 Ngôh nata tâkâ sâh hluhpi hlâta na pakah liata ryhpa bie a puapa cha kei châta a pha via na.
Abeipa Ryhpa âdona
73 Na ku ta na tao chi ta, eina padua chi; na biepiepa zy cha ei chu thei nawpa ta pahno thaina na pie mah y.
74 Cha chituhpazy chata na hmô aw ei ta, amâ ly aw, na bie cha ei hnabei a seih tyhpa vâta.
75 Hy ABEIPA, na pachiapazy cha a sia tahpa nata nâ chata ngâchhih ngaitapa ta rie eina pathei chi tahpa ei pahno.
76 Châ chakaopa hnohta na bietaipa lymâ hawhta ngiachhie ngaitapa ta na kyhpachâ ngiachhiena cha ei thlahlôhna awpa châ mawh sy.
77 Ei hroh theina awpa ta na thapasana zy kei lâta a vy mawh sy; na ryhpa bie cha ei lyna châ tlôh ta.
78 Apalaipazy cha maohphyuhpa ta y ei se, a do lei ngaitapa ta na panawh tlôh ei ta; châhrasala na chhoreina biezy ei pachâ aw.
79 Châ chituhpa zy cha kei lâta a vaw heih ei se. chatanachata na bie pahnosapazy cha ama pahno aw na.
80 A maohphyuh lei nawpa ta ei pathipalôh he na bieraopa zy liana chata pha pakipa ta y mawh sy!
Pabohsa nawpa ta thlahchhâna
81 Ei hrona he na pachhana vâpa ta panao ta; châhrasala na bie ei hnabei a seih tyh.
82 Na bie saina châta ei mo bâ haw ta; “Nâ ta khatita e thlah eina palôh aw chi?” ei tah tyh.
83 Meikhuh ta a ryhpa savo titheih hawhna cha châ haw tlôh na ta, châhrasala na bieraopazy cha my va na.
84 Châ chakaopa hro noh awpa he khazie e a châ aw? Nâ taolatuhpazy chô liana heta khatita e na pachia aw?
85 Apalaipa na ryhpa bie hawhta a yleipa zy chata. ei tlana châta khaohtlôpa zy chao ei ta.
86 Na biepiepa zydua cha ngâchhihpa a châ; âmo chata a do lei ngaitapa ta eina taola tyh ei hih; na bao mah y!
87 Âmozy chata alei liana heta na pahleipadia daihmâ ei ta; châhrasala na chhoreina biezy cha a heisai tlôh leipa na ta.
88 Na kyhpachâ ngiachhiena zie lymâ hawhta na pahro mah y. chatanachata na pakah liata bie pahnosapa cha ei zyh aw.
Abeipa Ryhpa liata ngiapâna
89 Hy ABEIPA, chhâzaw chata na bie cha avâ liata a i ngaitapa ta y ta.
90 Na ngiachhiena cha chhâ zydua taihta a y aw; leilô he paysa chi ta, a y lymâ thlâh haw.
91 Chazy cha atanoh heta na ryureipa zy hawhta y thlâh haw ei ta; hmo zydua cha châ chakaopazy châ tlôh ei ta.
92 Na ryhpa bie cha ei lyna a châ leipa khiahta cha, ei rietheina liana khata ei leidia ha awpa a châ.
93 Na chhoreina biezy cha khatita hmahta my aw va na; nâ ta chazy chata na pahra haw tlôh chi ta.
94 Nâ eih ei châ hih, na pachha mah y; na chhoreina biezy cha tlua tlôh na ta.
95 Hmoparaopazy chata pahleipadia nâ chhuahpa ta einâ ly tyh ei; châhrasala na bie pahnosapa zy cha ei pachâ aw.
96 Phapakina zydua chhâna cha hmô haw na ta, na biepiepa deikua cha a kawh ngaita kaw.
Abeipa Ryhpa châta kyhpachâna
97 Na ryhpa bie he ei pasô kaw dia! Noh y ta ei pachâ tyh.
98 Na biepiepa zy chata ei khakhaipa zy hlâta sôh viapa ta na tao ta, chhâzaw ta ei hnohta a y tyhpa vâta.
99 Na pachutuhpa zydua hlâta sona ei hnei via, na bie pahnosapazy he ei pachâpa a châ tyhpa vâta.
100 Machâpazy hlâna chata ei pahno thai via, na chhoreinazy he a phapa ta ei vaopa vâta.
101 Na bie ei zyh thei nawpa ta hmo moleipa lia rai chata ei pheizy he chakâ awpa ta pasaih va na.
102 Na pachiana tawhna zy chata tlei va na, nâ ta eina pachu vâ chi ta.
103 Na biezy he ei pakah châta a thlôh kaw dia. Ei pakah châna chata kheihti hlâta a thlôh via!
104 Na chhoreina biezy vâta pahno thaina ei hnei tyh; chavâta yzie do leipa to he ei hao.
Abeipa Ryhpa tawhta khaihna
105 Na bie he ei pheizy châna heta meiôh châ ta, ei lâpi châta khaihna a châ.
106 Na pachiana a sia ngaitapazy cha zyh awpa ta chhie sakhâh na ta, pa-i hra na ta.
107 Thata rie patheipa ta y na ta; hy ABEIPA, na bie lymâ hawhta na pahro mah y!
108 Hy ABEIPA, ngiachhie ngaitapa ta ei hmo piepazy he la la. na pachiana zie cha na pachu mah y.
109 Ei hrona he ei ku liata khâ y tyh ta, châhrasala na ryhpa bie cha my beih va na.
110 Hmoparaopazy chata ei ao nawpa ta khoheih chôh ei ta, châhrasala na chhoreina biezy cha paviasai va na.
111 Na bie pahnosapa zy cha chhâzaw ta ryuto châta la na ta; ei pathipalôh tha a paphasatuhpa châ tlôh ta.
112 Chhâzaw ta chhâna taihta na bieraopa zy hawhta tao awpa ta ei pathipalôh paheisa na ta.
Abeipa Ryhpa liata abohna
113 Palôhrupa hlei a hnei leipa chyhsa zy cha a hao na ta, na ryhpa bie deikua cha ei pasô.
114 Nâ cha ei nyuna su nata ei vyhphao châ chi ta; na bie liata ei hnabei a seih tyh.
115 Nâmo hmo moleipa a taopa saih u, na siesai teh u. ei Khazohpa biepiepa zy a phapa ta ei vao theina hâh ta.
116 Ei hroh thei nawpa ta na bie lymâ hawhta na patu thlâh ha hra la, ei hnabeiseihna chô liana heta nozapa ta na paysa khah y!
117 Na cha-ao mah y, chatanacha a boh aw na ta, na bieraopazy cha khâ ei papeisa aw!
118 Na bieraopazy a paviasaituhpa zydua cha mohnao chi ta; ama dôna cha haipa châ tlôh ta.
119 Alei liata hmoparaopa zydua cha a sipa hawhta pahlei tyh chi ta; chavâta na bie pahnosapa zy cha ei pasô.
120 Ei sapa he nâma chipa ta a chalyu ta, na pachiana zy cha chi hra na ta.
Abeipa Ryhpa lâta reingiahna
121 Pachiana ta a sia ngaitapa ta ei tao tyh; na pasaipa-ituhpazy liatahpa na siesai kha y.
122 Châ chakaotuhpa kyh liata a phana awpa a totuhpa châ la; apalaipazy ta na pasaipa-i khah ei se.
123 Na pachhana saina chata ei mo bâ haw ta. na bie sia ngaitapa saina châta chhao.
124 Na zawngiahna lymâ hawhta châ chakaotuhpa chô liana heta tao la, na bieraopazy cha na pachu mah y.
125 Châ chakaopa châ na ta; pahnothaina na pie mah y, na bie pahnosapazy cha ei pahno theina hâh ta!
126 ABEIPA, hria a dai haw, na ryhpa bie he khâpa hrao leipa ta tao haw tlôh ei ta.
127 Chavâta na biepiepazy cha ngôh hlâta ei pasô, ngôh suapa hlâ chhaota.
128 Chavâta kyh torai kyh liata na chhoreina bie zydua cha a dopa ta pahnona ta; yzie a do leipa to he ei hao.
Abeipa Ryhpa zyh khona
129 Na bie pahnosapa zy cha noâh â chhih; chavâta ei hrona heta a phapa ta âvao tyh.
130 Na bie pahnosapa heta chyhsa zy pakhaih ta, a ngâpazy cha a pahno thaisa tyh.
131 Ei pakah a kawhpa ta â na ta, ei hu a hiah, na biepiepazy cha ei vâ ngaitapa vâta.
132 Kei lâ a vaw heih la, na ngiachhie mah y, na moh a pasôtuhpa zy na ngiachhiepa hawhna khata,
133 Ei phei chakâna he na bie liata pa-i la, hmo moleina rai ei chô liata bie pahneisa khah y.
134 Chyhsa pasaipa-ina tawhtapa na pachha la, chatanachata na chhoreina biezy cha ei zyh aw.
135 Na hmia ta châ chakaotuhpa chô liata khaih la, na bieraopazy cha na pachu mah y.
136 Ei mothlih he chavah ti hawhta loh ta, na ryhpa bie ama zyh leipa vâta.
Abeipa Ryhpa siana
137 Hy ABEIPA, nâ cha sia chi ta, na pachiapazy chhao â do na.
138 Na bie pahnosapa zy cha a sia ngaitapa nata ngâchhih ngaitapa ta bie chi ta.
139 Ei phahnai khohna heta eina patlô haw, nâ dyuhtuhpazy ta na bie ama my hawpa vâta.
140 Na bie he a pathaih ngâsâ, chavâta châ chakaopa heta a pasô.
141 A chyhpa nata mohnaopa châ na ta, châhrasala na chhoreina biezy cha my va na.
142 Na siana cha chhâzaw siana awpa châ ta, na ryhpa bie chhao hmeihseihpa a châ.
143 Nôpona nata thlahzona chata na tlathlu haw ta, châhrasala na biepiepazy he ei lyna cha.
144 Na bie pahnosapazy cha chhâzaw châta a sia na; pahno thaina na pie mah y, chatanachata ei hroh thlâh ha aw.
Pabohsa nawpa ta thlahchhâna
145 Ei pathipalôh zydua ta cha padona ta; hy ABEIPA, nâ chhy mah y! na bieraopazy cha a phapa ta ei vao aw.
146 Cha pado tyh na ta; na pachha mah y, chatanachata na bie pahnosapazy cha
147 Mydi khihdei hlâta thyu na ta, pado tyh na ta; na biezy liata ei hnabei a seih tyh.
148 Na bie ei pachâ thei nawpa ta ei moh ta zâ vaina zy hlâta a hra tyh.
149 Na kyhpachâ ngiachhiena lymâ hawhta ei ao he nahthlie la; hy ABEIPA, na pachianazy lymâ hawhta na pabohsa mah y.
150 Pachâna moleipa a chadaipa sahlao chata a vaw hnia ei ta; âmo cha na ryhpa bie a hlapa ta a ypa ama châ.
151 Hy ABEIPA, nâ cha a hnia chi ta, na biepiepa zydua cha hmeihseihpa a châ.
152 Hlâno ta na bie pahnosapa zy tawhta, chazy cha chhâzaw châta na pa-i tahpa ei vaw pahno haw.
Pachhana hiana
153 Ei riethei zie he pachâ la, na pachha mah y, na ryhpa bie cha my beih tlôh lei khâh na ta.
154 Ei bie na reikheipa ta na chatlai la; na bie lymâ hawhta hrona na pie mah y.
155 Pachhana cha hmoparaopazy tawhta â hla, na bieraopazy cha ama tlua leipa vâta.
156 Hy ABEIPA, na zawngiah thapasana zy cha thata a châ; na pachianazy lymâ hawhta hrona na pie mah y.
157 Na taolatuhpazy nata nâ dyuhtuhpa zy cha a hluhpi ama châ, châhrasala na bieraopa zy cha tleisai va na.
158 Piehpie ngaitapa ta a taotuhpa zy cha moh na ta, ei palôh châ leipa ta, na bie ama zyh leipa vâta.
159 Na chhoreina biezy ei pasô zie he pachâ la, hy ABEIPA, na kyhpachâ ngiachhiena lymâ hawhta ei hrona pabohsa mah y.
160 Na bie a pahlypakhypa cha hmeihseihpa châ ta. na pachiana siapa to chhao he chhâzaw ta a y thlâh ha aw.
Abeipa Ryhpa lâta ahlâna
161 Abeisawzy ta a chhâpa y leipa ta na taola ei ta, châhrasala ei pathipalôh chata na biezy a chi.
162 Na bie liana heta ei tha a pha, hmo rôhnah ngaitapa hraona a hmôtuhpa hawhta.
163 Haipa he a haopa ta pasi na ta, na ryhpa bie deikua cha ei pasô.
164 Noh kha ta ei sari ei cha reithai tyh, na pachiana siapazy vâta.
165 Na ryhpa bie a pasôtuhpa zy chata thlahlôhna thata hnei ei ta; paona rai hnei veih ei.
166 Hy ABEIPA, na pachhana ei hnabeiseih thlâh ha ta, na biepiepazy hawhta ei tao tyh.
167 Ei hrona heta na bieraopazy cha zyh tyh ta; ei pasô ngaita kaw.
168 Na chhoreina biezy nata na bie pahnosapa zy cha zyh tyh na ta, ei yzie zydua he na hmiakô liata a ypa châ tlôh ta.
A châkhei nawpa ta thlahchhâna
169 Hy ABEIPA, ei awna he na hmiakô liata a vaw hnia mawh sy; na bie lymâ hawhta pahno thaina na pie mah y!
170 Ei hiah chaimâh na he na hmiakô liata tlô mawh sy; na bie lymâ hawhta na pachha mah y.
171 Ei hmao heta reithaina bie reih mawh sy, nâ ta na bieraopazy cha eina pachu tyhpa vâ chi ta.
172 Ei paleih heta na bie reithaipa ta sa mawh sy, na biepiepa zydua cha siana a châpa vâta.
173 Na ku cha na bao awpa ta amâ chiehpa ta y mawh sy, na chhoreina biezy cha a tlyh tlôh na ta.
174 Hy ABEIPA, na pachhana cha vâ tyh na ta, na ryhpa bie cha ei lyna a châ.
175 Na pahro mah y, chatanacha ei cha reithai aw na, na pachianazy chhaota na bao mawh sy.
176 Mietahkupa a leipa hawhta viavi na ta; châ chakaopa he tlua mah y; na biepiepa zy cha my beih tlôh lei khâh na ta.