Abeipa pachhana vâta alyna bie reina
1 ABEIPA lâta lyna bie reih teh u, ano cha pha tlôh ta; a zawngiahna chhao chhâzaw ta y tlôh aw ta!
2 “A zawngiahna cha chhâzaw ta a y aw,” tahpa Izarel sahlaozy chata reih ei se.
3 “A zawngiahna cha chhâzaw ta a y aw,” tahpa, Arawna chhôhkhapa zy chata reih ei se.
4 “‘A zawngiahna cha chhâzaw ta a y aw,” tahpa ABEIPA a chituhpazy chata reih ei se.
5 Ei nôpona tawhta ABEIPA cha padona ta; ABEIPA chata nâ chhy ta, su kawh ngaitapa liata na paysa haw ta.
6 ABEIPA cha kei chhâh a châ, chi aw va na. Chysa ta kheihta eina tah thei aw?
7 ABEIPA cha kei chhâh a châpa nâ baotuhpa zy hry liatahpa cha; chavâta nâ haopazy chô liata ei khona zie cha ei hmô aw.
8 Chyhsapa ngâpa hlâta cha ABEIPA liata ngâna pahniehpa he a pha via.
9 Abeisaw zy ngâpa hlâta cha ABEIPA liata ngâna pahniehpa he a pha via.
10 Phopi to ta na chadô ei ta; âmo cha ABEIPA moh ta ei pahleipadia aw!
11 Âmo chata na chadô ei ta; âmo cha ABEIPA moh ta ei pahleipadia aw!
12 Akheih zy hawhta na chadô ei ta, ahloh mei patipa hawhta pachhaipa ta ama y; âmo cha ABEIPA moh ta ei pahleipadia aw!
13 Ei paona châta thata na chho awpa ta a chhie sa chi ta, châhrasala ABEIPA chata eina bao.
14 ABEIPA cha ei thatlôna nata ei hla a châ; ei pachhana vaw châ haw hra ta.
15 Alyna nata pachhana pyu cha a siapazy poh-o liata y tyh ta: “ABEIPA ku chachâh lâ chata riahpha ngaitapa ta a tao tyh.
16 ABEIPA ku chachâh lâ cha palyupalihpa ta y tyh ta, ABEIPA ku chachâh lâ chata riahpha ngaitapa ta a tao tyh!” tahpa ta.
17 Thi aw va na, tlao hroh aw na ta, ABEIPA hmotaopazy cha ei pahnosa.
18 ABEIPA chata thata na chhorei ta, thina lâna deikua cha na pie vei.
19 Siana ochhizy he na pahypa teh u, hezy liana heta a ngia aw na ta, ABEIPA lâta alyna bie ei reih aw.
20 He he ABEIPA ochhi a châ; a siapazy cha amâ ngia aw.
21 Nâ lâta alyna bie ei reih aw, nâ ta nâ chhypa ta ei pachhana vaw châ haw tlôh chi ta.
22 O a satuhpa zy alô kho leipa kha, a ki liata phahnai chaipa a vaw châ haw.
23 Cha cha ABEIPA taopa châ ta; eima mohmô liata noâhchhihpa a châ.
24 He he ABEIPA noh raopa cha châ ta; he liana heta thaphapa ta eimâ ly aw.
25 Hy ABEIPA, ngiachhi ngaitapa ta maniah pachha la! Hy ABEIPA, ngiachhie ngaitapa ta vâhneina vaw tuah mah y!
26 ABEIPA moh ta a vypa cha reithaipa ta y se! ABEIPA o tawhna heta byhnâ eima cha aw pa ei.
27 ABEIPA cha Khazohpa a châ, ano chata khaihna maniah pie ta. Atheihna awpa cha khawhri ta hrai teh u, maisâh kizy tlai liana chata!
28 Nâ cha ei Khazohpa châ chi ta, alyna bie cha hlâ aw na ta; ei Khazohpa châ chi ta, ei cha palyupalih aw.
29 ABEIPA lâna cha alyna bie hlâ teh u. ano cha pha tlôh ta; a zawngiahna chhao chhâzaw ta y tlôh aw ta.