Khazohpa nata khazoh nohthlahpa zy
1 Keimo lâta châ leipa ta, hy ABEIPA, keimo lâta châ leipa ta, nâ mo lâna cha rôhnahna tlao pie mah y. na zawngiahna nata na hmeihseihna vâta.
2 Khazia e phopizy ta, “Khataih liata e ama Khazohpa a y haw?” ama tah.
3 Eima Khazohpa cha avâzy liata y tlôh ta; a khopa maih a tao haw.
4 Ama khazoh nohthlahpazy cha tâkâ nata ngôh châ ei ta, chyhsa ku ta taopa a châ.
5 Pakah zy hnei ei ta, reih pathlie thei tlôh leipa ei ta; mozy hnei ei ta, hmô thei tlôh leipa ei ta.
6 Nahkhaozy hnei ei ta, thei thei tlôh leipa ei ta; hnapasuzy hnei ei ta, roh thei thei tlôh leipa ei ta.
7 Kuzy hnei ei ta, khâpa hmah hria thei tlôh leipa ei ta; pheizy hnei ei ta, sie thai tlôh leipa ei ta; ama rao ta reih pathlie thei hra veih ei.
8 Chazy a taotuhpa zy nata âmo liata ngâna pahniehpa maih chhao cha; nohthlahpa zy ama taopa hawhta ama lie aw.
9 Hy Izarel sai u, ABEIPA cha ngâ teh u! Ano cha âmo a baotuhpa nata ama vyhphao a châ.
10 Hy Arawna chhôhkhapa saih u, ABEIPA cha ngâ teh u! Ano cha âmo a baotuhpa nata ama vyhphao a châ.
11 ABEIPA a chituhpa saih u, ABEIPA cha ngâ teh u! Ano cha âmo baotuhpa nata ama vyhphao a châ.
12 ABEIPA chata maniah pahno thlâh ha ta; byhnâ maniah a aw pa; Izarel chhôhkhapa zy cha byhnâ awpa aw ta; Arawna chhôhkhapa zy cha byhnâ a aw pa aw;
13 ABEIPA a chipazy cha byhnâ a awpa aw; a nawhpa nata a laipa.
14 ABEIPA chata cha papôhsa via rili ei se, nâmo nata nama sawzy chhaota!
15 ABEIPA byhnâ a totuhpa nama châ, ano cha avâ nata alei a taotuhpa a châ!
16 Avâzy khi ABEIPA avâzy châ ta, leilô deikua he chyhsa sawzy a pie.
17 Athihpazy chata ABEIPA cha reithai leipa ei ta, sidia ngaitapa lâta a zupa zy chata reithai hra veih ei.
18 Keimo deikua chata ABEIPA cha eima reithai ha aw, atahmâ tawhta chhâzaw ta. ABEIPA cha reithai teh u!