Viarithô nawpa ta awna
Hla chhihthatuhpa châta: Davi Reithaina Hla.
1 Hy ei reithaipa Khazohpa, a chalih thlâh ha khah y!
2 Hmoparaopa pakah nata pakah dôhmâhpa cha ei chô liata a tlôh ei ta, âmo chata paleih haihthaipa ta ei hnohta bie reih ei ta.
3 A haona bie ta na chadô ei ta, a chhâpa y leipa ta nâ dyuh ta.
4 Kyh ei pachâpa vâta nâ dyuhtuhpazy vaw châ haw ei ta, châhrasala kei cha thlahchhâ awpa ta khâchâ a pie na ta.
5 Âmo chata hmophapa cha hmo moleina ta na thô ei ta, ei kyhpachâna cha ahaona ta na thô hra ei ta.
6 Nâ ta a chô liata chyhsa moleipa paysa la, a chachâh lâta a leihtuhpa a duah mawh sy.
7 Pachiapa ta a y tita thai lei châpa ta pua sala; a thlahchhâna cha moleina ta vaw châ mawh sy!
8 A hro nohzy cha chyu sala; a hyutuhpa châna cha chyhsa hropa ta to mawh sy!
9 A sawzy cha paw leipa ta y ei sala, a lahpinô cha nôhmeipa ta y mawh sy!
10 Ano sawzy viavipa ta ypa ta kudao ei sala; ama nie awpa cha ama su roryhrapa zy liana chata tlua ei se!
11 A pôhna a chadaipa ta tâkâ a pacheisatuhpa chata a hneipa zydua lapa khai sala; khichhaipazy chata a hriapasana zy thei cha hrao ei se.
12 A chô liata zawngiahna a palâsa lymâ tuh awpa ahy hmah y khah ei sala, paw hnei leipa sawzy a ngiachhietuh awpa ahy hmah y hra khah ei se!
13 A pathlazy cha pahleipadiapa ta y ei sala; chhâ a vaw y heih awpa liana chata ama moh cha phiepa ta y mawh sy!
14 A mahpawzy hmoparaona cha ABEIPA liata a thei thlâh hapa ta y sala. a nô moleina cha phiepa ta y khah se!
15 Chazy cha ABEIPA hmiakô liata khâ y mawh sy; ano chata âmo a thei thlâh hana cha alei tawhtapa a pahleipadia theina hâh ta.
16 Zawngiahna palâsana cha a thei leipa ta, sipasapa, dyhchhiepa nata pathipalôh akeipa zy cha thie a chhuahpa ta tlao ataolapa vâta.
17 A chhiesapa he a kho viapa châ ta; ano chô liata vaw tlô mawh sy! Byhnâ awpa he a lyna zie châ leipa ta; chatanachata ano tawhta a hlapapi ta y ta!
18 Poh a bupa hawhta chhiesana cha abu ta, cha cha a chhôhzy liana chata ti hawhta a ngia ta, a rupazy liana chata sathaw hawhta a ngia hra ta!
19 Cha cha ano chata a ky tyh na chysia hawhta y sala, a sai tyh na chaisaihna châ hra mawh sy!
20 Chazy cha nâ dyuhtuhpa zy nata ei hrona reipachhietuhpa zy ABEIPA ta viari a thôna a châ!
21 Châhrasala hy KHAZOHPA, Abeipa nâ ta na moh vâta na taokhei la; na zawngiahna a phapa vâta na pachha mah y!
22 Sipasapa nata dyhchhie ngaitapa châ na ta, ei pathipalôh he ei chhôh liata hmahphaohpa ta y tlôh ta.
23 Noh hawh a leina lâ hawhna heta lei na ta; khawsu hawhna heta phaoh pathlahpa ta y na ta.
24 Ei pakhuh zy he chaheihpa vâta thazeipa ta y ta; ei sapa heta thawna rai hnei vei.
25 Âmo reipachhiepa vaw châ haw na ta; eina hmô patanahta ama luh ama chahuah tyh.
26 Hy ABEIPA ei Khazohpa, na bao la! Na zawngiahna lymâ hawhta na pachha mah y!
27 Cha cha na ku a châ tahpa pahno theipa ta; ABEIPA, nâ ta na tao tahpa ama pahno theina awpa ta!
28 Âmo chata chhiesa ei se, nâ deikua chata byhnâ tlao pie mah y! Ama thyu patanahta maohphyuh aw ei ta; châ chakaotuhpa deikua cha a tha a pha aw!
29 Nâ dyuhtuhpazy cha nozana pabusapa ta y ei sala; viahpakao ta a pahlypa hawhta ama maohphyuhna ta a pahly ei se!
30 Ei pakah heta ABEIPA lâta alynabie thata ei reih aw; zawpi hry liata ano cha ei reithai aw.
31 Ano cha dyhchhiepa chachâh lâta â duah aw. a hrona a pachiapatuhpa zy pachha awpa ta.