Hlazy 107
Tymâna tawhta Abeipa ta a pabohsana
1 ABEIPA lâna cha alyna bie rei teh u, ano cha pha tlôh ta; a zawngiahna chhao chhâzaw ta y tlôh aw ta!
2 ABEIPA chatlaipa zy chata cha hawhpa cha reih ei se. dyuhtuhpa ku tawhta a chatlaipa
3 râh to tawhta a chhi pakhypa, nochhi nata notla, maw nata chho tawhna zy chata.
4 Râhpathohpa liata leisadi lâpi liana chata a khie ngâ ei ta, chyhsa yna khih rai hmô leipa ei ta;
5 nodi nata dâhphipa ta, ama hrona cha ama chhôh liata panao haw ta.
6 Cha pata nahta amâ tymâna liana chata ABEIPA cha pado ei ta, ano chata ama nôpona zy tawhna cha pachha ta;
7 chyhsa yna khih liata ama sia thei nawpa ta, lâpi a do ngaitapa liana chata chhihtha haw ta.
8 Chyhsazy heta ABEIPA cha a zawngiahna vâta nata chyhsapa sawzy chô liata a hmonoâh taopazy vâna heta ama reithai mawh sala!
9 Ano chata hrona byuh ngaitapa cha lôhrâ patlô ta, hro nodipa cha phana ta pabie tyh tlôh ta.
10 Zohna ry liata nata thina nohpahli liata atyuhpa ta, rietheina nata thua ta chahrypa zy cha,
11 Khazohpa bie chô liata zy aty ei ta, Chônôchaipa ryhraopa cha khâpasaw ta ama reih leipa vâta.
12 Ano chata ama pathipalôh cha hriapasana ta pahnie haw ta; pao ei ta, baotuh awpa rai y tlôh leipa ei ta.
13 Cha pata nahta amâ tymâna liana chata ABEIPA cha pado ei ta. ano chata ama nôponazy tawhtapa cha pachha ta;
14 zohna ry tawhtapa nata thina nohpahli tawhtapa cha papua ta, ama chahryna zy cha chhie haw ta.
15 Chyhsazy heta ABEIPA cha a zawngiahna vâta nata chyhsa sawzy chô liata a hmonoâh taopazy vâna heta ama reithai mawh sala!
16 Ano chata dawh chhikao cha parao ta, a hriana thua tlaizy cha thlie haw tlôh ta.
17 Ahrupazy cha ama taopasina vâta nata ama hmo paraona zy vâta rie a pathei tyh ei ta;
18 ama hrona chata niepa to he pasi ta, thina chhikaozy cha a hnia tyh ei ta.
19 Cha patanahta amâ tymâna liana chata ABEIPA cha pado ei ta, ano chata ama nôponazy tawhtapa cha a pachha tyh;
20 A bie cha tuah ta, âmo cha patlâh tyh ta, ama leidiana awpa zy tawhtapa cha a pachha tyh.
21 Chyhsazy heta ABEIPA cha a zawngiahna vâta nata chyhsapa sawzy chô liata a hmonoâh taopazy vâna heta ama reithai mawh sala!
22 Âmo chata alyna bie rei atheihna zy hlâ ei sala, a hmotaopazy cha hla sapa ta chho ei se!
23 Tilaipi liata balyh laipa ta zupa ta, ti kawh ngaitapa chô liata rai a hria tyhpa zy chata;
24 chazy chata ABEIPA hmotaopazy nata ti a thuh ngaitapa liata a hmonoâh taopazy cha ama hmô tyh.
25 Ano chata bie pie ta, thlihpipa pathlisa ta, cha chata a chalâhparapa zy cha a pasa tyh.
26 Avâ lâta kiah ei ta, athuh ngaitapa liata chô heih ei ta; nôpona vâta ama hrona cha a zao tyh;
27 sahhma paripa hawhta pao chheichhâ ei ta, a viavô ei ta, yzie awpa rai pahno thai veih ei.
28 Cha patanahta tymâna liana chata ABEIPA cha pado ei ta, ano chata ama nôpona tawhtapa cha a pachha tyh;
29 Thlihpipa cha chalihsa ta, chatanachata a chalâhparâpa zy si a dia tyh.
30 Chatawhcha sidiapa ta a y hawpa vâta aly tyh ei ta, ano chata ama kho ngaitapa lichakohpa lâna chata a chhitha tyh.
31 Chyhsazy heta ABEIPA cha a zawngiahna vâta nata chyhsa sawzy chô liata hmonoâh taopazy vâna heta ama reithai mawh sala!
32 Âmo chata chyhsazy apakhyna liata ano cha reithai ei sala. machâ sahlao atyuna liana chata reithai ei se.
33 Ano chata chavahzy cha râhpathohpa lâta pachâsa tyh ta, tihnawhzy cha chhaolei chawhkaraipa lâta a pachâsa tyh,
34 râh phapa cha râhchawhpa iahpa lâta a pachâsa tyh. a chhôh liata a pahrâpa sahlao hmoparaona vâta.
35 Râhpathohpa cha tipo lâta pachâsa tyh ta, chhaolei hipa cha tihnawhzy lâta a pachâsa tyh hra.
36 Cha liana chata nodipazy cha a pahrâsa tyh. yna awpa khih a chhuahdy ei ta;
37 lyuzy hnei ei ta, kresahdô zy tao ei ta, a theilâpa a vaw pôhna zy cha ama hmô thei nawpa ta.
38 Âmo cha byhnâ aw pa tyh ta, chatanachata thata papôhpa ta y ei ta; ama sahroh zy cha a sypa ta pasai tyh leipa ta.
39 Chatawhcha pasaipa-ina zy, Rietheinazy,pachârôhna zy vâta a sy rili ei ta, a bôh via ngâpa ta y ei ta.
40 ano chata abeisawzy chô liata mohnaona lei thlu tyh ta, râhpathohpa lâpi a y leina liana chata paviasa ta;
41 châhrasala sipasapazy cha rietheina tawhta su sâhpa liata chalo tyh ta, Sa zaw hawhta chhôhkhazy a taopa tyh.
42 Â do ngaitapazy chata cha cha hmô aw ei ta, amâ ly aw; hmo moleina zydua chata a pakah a chahu aw.
43 Ahyrai a sopa maihta chazy cha a phapa ta a ô aw ei ta; ABEIPA zawngiahna zy ama pachâ aw.