Pachârôhna ao
Riethei a taotuhpa thlahchhâna, panaopa ta ABEIPA hmiakô liata a nôpona bie a rei notahpa.
1 Hy ABEIPA, ei thlahchhâna he thei la; ei awna pyu he nâ lâta tlô mawh sy!
2 Ei nôpo noh liata kei tawhna heta na hmia nyu khah la! kei lâna heta na nah vaw pachôh la; ei cha pado daihtina chata nâ chhy patoh mah y!
3 Ei hro chhôh nohzy he meikhuh hawhta lei ta, ei rupazy he meitho hawhta kâ ta.
4 Ei pathipalôh he sibiepa hawhta ai saopa ta y ta, uah haw ta; pati nie chhao my tlôh na ta.
5 Ei rôh ngâna ao vâta ei ruzy he ei sapa liata khâchâ â bai.
6 Râhpathohpa riasi hawhta châ na ta, khih rypa vaku hawhta deita ei vaw châ haw;
7 A hra thlâh ha na ta, boby o chô liata ano deita ta a ypa hawhta ei vaw châ haw.
8 Ei khakhaipa zy chata noh y ta na reipachhie tyh ei ta, ei chô liata ahrâhpa chyhsa zy chata keima hawhta y awpa ta chhie ama sa tyh.
9 Buchâh he pati hawhta nie na ta, ei do awpa cha mothlih nata pahlao tlôh na ta,
10 na palôh châ lei ngaitana nata na hiehâhna vâta; nâ ta na chalo chi ta, na thy pathlah haw tlôh chi ta.
11 Ei hro chhôh noh zy he noh hawh lei ngâpa hawhta châ ta; sibiepa hawhta uah haw na ta.
12 Hy ABEIPA, nâ deikua cha chhâzaw ta y aw chi ta; nâma athei thlâh hana chhao chhâ zydua taihta a y hra aw.
13 Thyu aw chi ta, Zaio cha zawh nâ ngiah aw; ano cha zawngiah a daih haw tlôh ta; daihti raopa cha a tlô haw.
14 Châ chakaopa zy chata ano alôzy cha pasopa ta; a dohlei chhao ngiachhie tlôh ei ta.
15 Pho to ta ABEIPA moh chi aw ei ta, alei liata abei zydua chata na rôhnahna cha ama chi hra aw.
16 ABEIPA chata Zaio cha sa pathi haw tlôh ta, a rôhnahna ta a pahlypa ta â la haw ta;
17 atovahiapa thlahchhâna cha a papeisa ta, ama thlahchhâna cha mohnao vei.
18 Cha cha chhâ a vaw y awpa châna chata ropa châ aw ta, pho taopa ta a vaw y awpa chata ABEIPA cha ama reithai aw;
19 ano chata a su pathaihpa a sâh ngaitapa tawhta za moh ta, ABEIPA chata avâ tawhna khita alei he hmô ta,
20 atâhpa a rôhna cha thei awpa nahta, thi awpa raopa zy cha pathlie awpa ta;
21 ABEIPA chakao awpa ta chyhsa to nata râh to amâ pakhy tita,
22 chyhsa zy ta ABEIPA moh cha Zaio liata chho theipa ta, Zerusale liata ama chho thei na hâh ta.
23 Ano châta siena liana heta ei tha pachie leipa ta paysa ta; ei hro chhôh he pachyusa ta.
24 “Hy ei Khazohpa, ei locho noh liana zy heta na la khah y, nama kôzy cha chhâ chhôh zydua liata a y aw!” tah na ta.
25 Leilô bôna cha hlâno ta na bô hawpa châ ta, avâzy chhao na ku hriana a châ.
26 Chazy cha leidia aw ta, nâ deikua cha na y thlâh ha aw; cha zydua cha chysia hawhta paro aw ta. Poh hawhta ri aw chi ta, a vaw nano ha aw;
27 nâ deikua cha na ualua ta khâ châ chi ta, na kôzy chata chhâna noh rai hnei aw vei.
28 Châ chakaopa zy sawzy cha y lymâ aw ei ta; ama pathlazy cha na hmiakô liata pa-ipa ta ama y aw.