1 Chatawhcha dôhpachhôh viapa, maw lâ chhâhna chata nâ chhi ta, a tlypa su dady maw lâ kuh o tôh dady chhôhpadâhpa liana cha nâ chhi ta.
2 Maw lâchhâh ta chhôhpadâhpazy cha dy za kha a seihpa, dy sypangawh a kawhpa châ ta.
3 Dôhpachhôh viapa a tlypa su dy syno lâ a heihpa nata dôhpa khôtho viapa lô paraihpa lâ aheihpa ta liah tlâh chhâh thôh y rairieh ta.
4 Chhôhpadâhpazy likawh liana chata dy hrawh a kawhpa, dy za kha a seihpa sie pahliena y ta, a ochhizy chata maw lâ a heih ta.
5 Chhôhpadâhpa chhôh viapazy cha buah via ta, o chhâh a ry viapa nata a liah liatahpa zy hlâta cha a liah tlâhzy chata hryu via tlôh ta.
6 Chhâh thôh ta sapa châ ta, dôhpachhôh tôhzy hawhna chata tôh hnei tlôh leipa ta; chatanachata a liah liatahpa hlâta cha a chô chaipa cha buah ta, a liah liatahpa chhao cha a ry chaipa hlâta cha buah hra ta.
7 Chatawhcha chhôhpadâhpa kâ lâ khôtho lâna chata dôhpachhôh khôtho viapa lâ dady ta pâhchhô dy sypangawh a seihpa y ta.
8 Dôhpachhôh khôtho viapa liata chhôhpadâhpazy dy sypangawh a seihpa châ tlôh ta, o pipa kiapâh liatahpa cha dy za kha a seihpa a châ.
9 Cha chhôhpadâhpazy ry liana chata nochhi lâ chhâh ta dôhpachhôh khôtho viapa tawhta a ngiana y ta,
10 khôtho lâ pâhchhô a thaona liana chata. Chhôh lâna chhao chata a tlyna su dady ta ku pâhchhô dady liana chata chhôhpadâhpazy y heih ta,
11 a hmiakô liata siena chhao cha maw lâ chhôhpadâhpazy siena hawh hra ta, a doh nata a hâ zy chhao, a puanazy a sâhna ziezy, a ochhizy ta chho lâ a heihpa dei leipa ta cha miakha sai a châ.
12 Cha chhôhpadâhpazy a ngiana chata sie pahliena chhâna nochhi lâ pâhchhô liana chata ochhi y ta.
13 Chatawhcha ano ta ei hnohta, “Maw lâ chhôhpadâhpazy nata chho lâ chhôhpadâhpazy a tlypa su a vaw daihpazy he chhôhpadâhpa pathaihpazy châ ei ta, ABEIPA a vaw hniatuhpa theihthaipa sahlaozy ta hmo zieh chaipazy nie ei ta; hmo zieh chaipazy so pakhy ei ta, niepa hlâna zy, moleina hlâna zy, thai leina hlâna zy ama hlâ awpa a châ, a su cha su pathaih châ tlôh ta.
14 Cha liata theihthaipazy amâ ngia khiahta cha su pathaihpa tawhta dôhpachhôh khôtho viapa lâna chata ama pua awpa châ vei, cha liana chata ama chakaona chysiazy cha tlao soh aw ei ta, chysia pathaihpa châ tlôh ta; chysia hropa a kypa ta vâtlâh mo ama hnia thei aw,” tah ta.
15 O pipa chhôh viapa a thlie khai tawhna chata nochhi lâ a heihpa chhikao lâna chata nâ chhi ta, a chheipâh ta thlie ta.
16 Thliena chôhchahrei chata nochhi lâchhâh cha thlie ta, dy za pangawh châ ta, a thliena chôhchahrei ta thliepa ta.
17 Maw lâ chhâh vaw thlie heih ta dy za pangawh châ ta, a thliena chôhchahrei ta thliepa ta.
18 Chho lâ chhâh thlie heih ta, thliena chôhchahrei ta thliepa ta dy za pangawh a châ.
19 Chatawhcha notla lâ vaw thlie heih ta, a thliena chôhchahrei ta thliepa ta dy za pangawh a châ hra.
20 A kiah miapalih cha thlie ta. A doh lâ dy za pangawh, a hâ lâ dy za pangawh châ ta, a chheipâh ta kuh pâhchhô a hneipa châ ta, cha cha su pathaihpa nata pathaih leipa châta taopa a châ.