Ezekiel 36
Noh hrota Izarel tao pathi nawpazie
1 “Chatawhcha nâ chyhsa y, Izarel lâzy lâta chhochhielie la, nâmo Izarel tlâhzy saih u, ABEIPA bie he nahthlie teh u.
2 Abeipa KHAZOHPA chata he tana heta a tah: Na chô liata na khakhaipazy chata, ‘Azi! hlâno asâhpa su zydua cha keimo eih a châ haw,’ ama tahpa vâta chhochhielie la,
3 Abeipa KHAZOHPA chata he tana heta a tah: Phopi laibâhpazy chata su to zydua liata cha palâ ei ta, roryhrapa ta ama cha taopa vâ nata chyhsa reih hluhpa reina nata reipachhiepa ta ama cha paysapa vâta;
4 nâmo, Izarel tlâhzy saih u, Abeipa KHAZOHPA bie he nahthlie teh u: Abeipa KHAZOHPA chata tlâh zy, tlâh byuhpa zy, chavah zy, saikao zy nata a ry hawpa su zy, khihpi roryhra hawpa chheipâh ta phopi a y tlakaihpa zy, hraona nata pahneisaona zy lâta he tana heta a tah;
5 chavâta Abeipa KHAZOHPA chata he tana heta a tah: Phopi laibâhpa nata Edôma zydua palôhrupa aly ngaitapa ta ei râh vaw hnei awpa ta a vaw rao chhypa ta, chyhsa nawhtaw ngaitapa ta hraona ta tao a chhuahtuhpazy chô liata hiatliana hiehâh ngaitapa ta bie ei reih tlai na.
6 Chavâta Izarel râh kyh liana chata chhochhielie la, tlâh zy, tlâh byuhpa zy, chavah zy, saikao zy hnohna chata Abeipa KHAZOHPA chata he tana heta a tah: Phopizy taolana pasa nama taopa vâta hiatlia ngaitapa nata pathi-ia ngaitapa ta bie ei reih;
7 chavâta Abeipa KHAZOHPA chata he tana heta a tah: Nama chheipâh liata phopizy chata âmo maohphyuna ama phaoh tlai aw, tahpa ta ei ku ei hy na.
8 “Nâmo deikua chata. Hy Izarel tlâhzy saih u, chiazy tlao aw eichi ta, ei chyhsa Izarelzy chata thei nama pathei aw; a vy tlôh aw ei ta.
9 Pachâ teh u, nâmo chhâh châ tlôh aw na ta, nâmo lâ a heih aw na ta, paliepa ta y aw eichi ta, hiepa ta nama y hra aw;
10 nâmo chô liata chyhsa papôh aw na ta, Izarel chhôhkha zydua, ama zydua chhaota su rypazy tao pathipa ta y aw ta, khihpizy cha pahrâpa ta a y aw;
11 nama chô liata chyhsa nata sa papôh aw na ta; pôh aw ei ta, thlao amâ chhi aw; nama yzie hmiatuapa hawhna khata pahrâpa ta cha paysa aw ei na ta, hmiatua ta nama yzie hlâta a phapa ta ei cha tao aw ei. Chatanachata kei he ABEIPA ei châ tahpa nama pahno aw.
12 Chatatlyh, nama chô liata chyhsa chareisa aw na ta, ei chyhsa Izarelzy tlai cha; cha pahrâ aw ei ta, ama ryutona châ aw chi ta, atahmâ rakha tawhta ama sawzy pahleisa khao aw va chi.
13 He tana heta Abeipa KHAZOHPA chata a tah: ‘Nâ, chyhsazy a palâtuhpa, na chyhsazy a pahlei tyhtuhpa na châ,’ ama cha tah tyhpa vâta,
14 chyhsazy palâ khao leipa aw chi ta, na chyhsazy chhao pahlei khao hra aw va chi KHAZOHPA ta a tah;
15 phopizy nawhtawna pasa cha pataosa khao leipa aw na ta, chyhsazy reipachhiena tao khao leipa aw chi ta, na chyhsazy pahlei khao aw va chi. Abeipa KHAZOHPA ta a tah, tah mah y,” tah ta.
16 ABEIPA bie cha ei hnohta vaw tlô ta:
17 “Chyhsa y, Izarel chhôhkhazy cha ama râh liata ama pahrâ nona khata, ama yzie nata ama hmotaopazy ta papuapalei ei ta; ei hmiakô liata ama yzie cha chanô thaitly leina nota a pathaih leina hawhta châ ta.
18 Chavâta râh chô liata thisaih palo ei ta, ama khazoh nohthlahpazy ta ama papuapalei vâta âmo chô liata ei pathi-iana cha lei thlu na ta.
19 Phopizy hry liata papai na ta, râh to liata hiepatlapa ta y ei ta; ama yzie nata ama hmotaopazy lymâ hawhta ama thâtih pachiapa na ta.
20 Ama siena phopizy ama tlô nahta, ei moh pathaihpa papuapalei ei ta, chyhsazy ta, ‘Hezy he ABEIPA chyhsazy châ ei ta, râh tawhta ama vaw pua he,’ ama vaw tah tyhna liana heta.
21 Châhrasala Izarel chhôhkhazy ta ama siena lâ phopizy hry liata ama papuapaleipa, ei moh pathaihpa cha ei tha a pasa.
22 “Chavâta Izarel chhôhkhazy hnohta Abeipa KHAZOHPA chata he tana heta a tah: Hy Izarel chhôhkhazy saih u, nâmo ei thapasapa vâta châ leipa ta, nama siena phopizy hry liata ama papuapaleipa ei mo pathaipa ei thapasapa vâta he he ei tao.
23 Ei moh rôhnah ngaitapa phopizy hry liata papuapaleipa, âmo hry liata nâmo tlaita nama papuapaleipa cha liahsa ei pathaisa aw; chatanachata phopizy chata ama mohmô liata nâmo liata pathaisapa ta ei y tina chata ABEIPA ei châ tahpa ama pahno aw, Abeipa KHAZOHPA ta a tah.
24 phopizy hry tawhta cha la aw ei na ta, râh zydua tawhtapa cha pakhy aw ei na ta, nama râh tlai liata cha chhihtha tlôh aw ei na ta.
25 Nâmo chô liata ti pathaihpa hie aw na ta, vaw pathaih aw eichi ta, nama pualeina zydua nata nama khazoh nohthlahpazy tawhtapa ei cha pathai aw ei.
26 Pathipalôh thiehpa cha pie aw ei na ta, nama chhôh liata thlahpa thiehpa ei soh aw, nama sapa tawhta pathipalôh châkarupa la aw na ta, sapa pathipalôh tlao ei cha pie aw ei.
27 Nama chhôh liata ei thlahpa soh aw na ta, ei bieraopa liata cha chareisa aw ei na ta, ei biepiepazy cha a ô aw eichi ta, nama tao hra aw.
28 Nama mahpawzy hnohta râh ei cha piepa liana chata nama pahrâ aw; nâmo cha ei chyhsazy châ aw eichi ta, kei chhao cha nama Khazohpa ei châ aw.
29 Nama pathaih leina zydua tawhta cha pachha aw ei na ta; sâh cha pahneisa aw ei na ta, papôh aw na ta, nâmo chô liata chakâhna patlôsa aw va na.
30 Theilâpa papôh aw na ta, kô paveisa aw na ta, chakâhna vâta phozy hry liata maohphyu khao aw vei eichi.
31 Chatanachata nama yzie moleinazy, nama hmotao phaleipazy athei tyh aw eichi ta; nama pasichhihna nata nama hmoparaona vâna chata nama mohmô tlai liata nama pasie ha aw.
32 Nâmo vâta he he ei taopa châ vei tahpa, pahno teh u, Abeipa KHAZOHPA ta a tah. Hy Izarel chhôhkhazy saih u, nama yzie vâna chata nozapa ta y ula, patypamâpa ta y teh u.
33 “Abeipa KHAZOHPA chata he tana heta a tah: Nama hmoparaona zydua tawhta ei cha pathai noh liana chata, khihpizy cha pahrâsa heih aw na ta, su ry hawpazy cha ei sa heih aw.
34 Râh roryhrapazy cha alei ama palie aw, cha hlâta chyhsa a khiekhâpazy mohmôna liata rory hra chiehpa châ hra sala.
35 Chatawhcha âmo chata, ‘He râh rory hrapa ta a y hawpa he, Idâh sahdô hawh tlaita a vaw châ; khihpi rypa ta rory hrapa ta a y hawpazy cha pahrâpa nata dôpa ta a y haw heih,’ ama tah aw.
36 Chatawhcha nama chheipâh ta phopi a ypazy chata kei ABEIPA heta su paraopazy cha sa pathi na ta, lyurâh roryhra hawpazy cha ei lo heih tahpa ama pahno aw; kei ABEIPA heta reih haw na ta, ei tao thei aw.
37 “Abeipa KHAZOHPA chata he tana heta a tah: Cha leipa chhaota he he Izarel chhôhkhazy cha ei pahiasa aw; sahroh zaw hawh tlaita chyhsazy papôh awpa ta.
38 Atheihna awpa sahroh zaw kyhchhi noh liata Zerusale sahroh zawzy hawh tlaita, cha hawhta khihpi ry chiehpa cha zawpi hluhpi ta a bie aw. Chatanachata kei cha ABEIPA ei châ tahpa ama pahno aw,” tah ta.