Seira tlâh hnohta chhochhieliena
1 ABEIPA bie cha ei hnohta vaw tlô heih ta:
2 “Chyhsa y, Seira Tlâh lâta a hei hnao la, a chô liata chhochhielie la,
3 a hnohta, Abeipa KHAZOHPA chata he tana heta a tah: Pachâ teh, hy Seira Tlâh y, ei châ dyuh na, na chô liata ei ku hy aw na ta, rory pahrâpa ta rarôh-y ngaitapa ta ei cha tao aw.
4 Na khihpizy a rypa ta tao aw na ta, roryhrapa ta na vaw y aw; ABEIPA cha ei châ tahpa na pahno aw.
5 Khâ nâ haopa vâta, ama hmoparaona hriena hnôh chaipa ta, ama vâchhiena noh liata Izarel pathlazy cha zaozi hmotaotheina liata pie chi ta;
6 ei hro na, thisaih chata ei châ chhuahdy aw, thisaih ta a châ chadai aw, thisaih nâ hao leipa vâta thisaih chata a châ chadai aw, Abeipa KHAZOHPA ta a tah.
7 Seira Tlâh cha rarôh y ngaitapa ta taopa ta rory ei pahrasa aw; a chô liata chyhsa a khiekhâ tyhpazy cha ei pachhâsa khai aw.
8 A tlâhzy cha ano chyhsa thiepazy ta ei pabie aw; na tlâhzy liata na saikao nata na chavah kaozy liata zaozi ta thiepazy cha ama pao hôlô aw.
9 Roryhrapa ta cha tao pathla aw na ta, na khihpizy cha pahrâpa ta y aw vei. Chatanachata kei he ABEIPA ei châ tahpa nama pahno aw.
10 “ABEIPA cha a y thlâh ha tarawpa ta, ‘He phopi mianozy he kei eih châ ta, ei hnei thlâh ha aw,’ na tahpa vâta,
11 ei hro na, Abeipa KHAZOHPA ta a tah, na hiehâhna lymâ hawhta nata nâ haona vâta hnâchhaona na palâsana zie lymâ hawhta ei tao aw; na thâtih ei pachia tina chata ama hry liata ei palâsa aw.
12 ‘Roryhrapa ta y haw ei ta, kei lâta piepa ta ama y haw; tahpa ta Izarel tlâhzy na reipachhiena zydua cha, kei ABEIPA heta ei thei khai tahpa nama pahno aw.
13 Ei chô liata na pakah ta a palaipa ta, ei chô liata bie pathlu chi ta; ei thei khai haw.
14 He tana heta Abeipa KHAZOHPA chata a tah, aleilô tlokhuh thaphana chata roryhrapa ta ei cha paysa aw.
15 Izarel chhôhkhazy ryuto roryhrapa ta a ypa vâta nâ lypa hawh hra ta, na chô liata ei tao aw; hy Seira Tlâh nata Edôma zydua tlokhuh roryhrapa ta a y aw. Chatawhcha ABEIPA cha ei châ tahpa ama pahno aw.