Ezekiel 25
Amawna mo hnohta chhochhieliena
1 ABEIPA bie cha ei hnohta vaw tlô ta:
2 “Chyhsa y, Amawna pathlazy cha a heihnao la ama thâtih chhochhielie teh.
3 Amawna pathlazy hnohna chata Abeipa KHAZOHPA bie he nahthlie teh u: Abeipa KHAZOHPA chata he tana heta a tah: Ei supathaihpa cha papuapaleipa ta Izarel râh roryhrapa ta, Zudah chhôhkhazy cha seichâna ta a chhipa ta a y nona kha ta, ‘A zi!’ nama tahpa vâta;
4 nochhi lâ chyhsazy hnohta ama cha hnei awpa ta ei cha pie aw, nâma liana chata riena su tao aw ei ta, nâma liana chata pahrâna su ama tao hra aw; na theilâpazy nie aw ei ta, na sâhpitizy ama doh hra aw.
5 Rabah khih cha râraoseihpa o ta tao aw na ta, Amawna pathlazy su cha sahroh abyuna su ta ei tao aw. Chatanachata ABEIPA cha ei châ tahpa nama pahno aw.
6 Abeipa KHAZOHPA chata he tana heta tah tlôh ta: Izarel râh chô liata na ku chabaipa ta na phei atlaipa ta palôhrupa zydua ta a raona chôta na lypa vâta,
7 na chô liata ei ku hy na ta, phopizy hnohta hraona châta ei cha patusa aw; chyhsazy tawhta cha chhaw pathla aw na ta, cha râh tawhtapa cha ei cha pahleidia aw; cha parao aw na ta. Chatanachata ABEIPA cha ei châ tahpa na pahno aw,” tahpa ta.
Môaba hnohta chhochhieliena
8 “Abeipa KHAZOHPA chata he tana heta a tah: Môaba chata Zudah chhôhkhazy cha pho hropa hawhta ama châ na, tah ta,
9 chavâta Môaba kâ lâ miakha khihpizy lâchhâh râhri thaby ta, khihpi a râh rôhnah chaipa zy, Bezeshimô zy, Baalmeôna zy, Kiriatha zy lâchhâh cha pahy aw na ta.
10 Nochhi lâ pathlazy hneina chata Amawna pathlazy chhaota pie aw ta, Amawna pathlazy cha phopizy hry liata a thei thlâh hapa ama châ khao lei nawpa ta,
11 Môaba râh chô liata pachiana cha patlô aw na ta, chatanachata ABEIPA cha ei châ tahpa ama pahno aw, tahpa ta.
Edôma hnohta chhochhieliena
12 “Abeipa KHAZOHPA chata he tana heta a tah: Edôma chata Zudah chhôhkhazy chô liata phuh lapa ta, thata hmo a parao, ano reisai ta ama chô liata phuh a lapa vâta,
13 chavâta Abeipa KHAZOHPA chata he tana heta a tah, Edôma chô liata ei ku hy aw na ta, ano tawhtapa chyhsa nata sazy ei pahleipadia khai aw; Temana tawhta rorypahrasa aw na ta, Deda taihta zaozi ta ama thie aw.
14 Chatawhcha ei chyhsa Izarelzy ku ta, Edôma chô liata ei phuhlana cha patlôsa aw na ta, Edôma chô liana chata ei hiehâhna lymâ hawhta nata ei pathi-iana lymâ hawhta tao aw ei ta, ei phuhlana cha ama pahno aw, Abeipa KHAZOHPA ta a tah.
Philistina mo hnohta chhochhieliena
15 “Abeipa KHAZOHPA chata he tana heta a tah: Philistina mozy ta phuh lapa ta chhâzaw a khakhaina ta eina pahleipadia khohna palôhrupa chhiepa phaohpa ta phuh ama lapa vâta;
16 Abeipa KHAZOHPA chata he tana heta a tah, Philistina mozy chô liana chata ei ku hy aw na ta, Kirethi khih chyhsazy cha chhaw pathla khai aw na ta, tilaipi kiah liata a y chhôhpazy cha ei pahleipadia khai aw.
17 Hiehâh ngaitapa ta rapa ta ama chô liata phuh la aw na ta. Cha hawhta ama chô liata ei phuh lana ei patlôsa tina chata ABEIPA cha ei châ tahpa ama pahno ha aw,” tah ta.